Фотоальбом листалiгöн ассьым видзöдласöс ме пырджык чöвтла том на муса мам вылö. Сэнi сылы сöмын кызь арöс — став олöмыс водзын, кыдз шулöны, кага ни баля, керка ни карта.
Ме вылö видзöдö косiник, латшкöс тушаа, мича мыгöра ныв. Медводз синмö шыбитчöны шань да небыд нюмыс, восьса да шоныд видзöдласыс, кельыдлöз синъясыс, лайкола сьöд синкымыс, рудов юрсиыс.
Оз ков ёнасö жуглыны юртö, медым гöгöрвоны, мый аддзан небыд, восьса сьöлöма, мелi да уджач мортöс. Варов да шмоньлив мамöй кокниа сибалö йöз дорö, енмöн сетöм авъялунöн кыскö ас дорас сиктсаясöс. Отсалö шогö усьöм да пикö воöм йöзлы. Чöскыда пусьö да таысь миянлы, дерт, нимкодь.
Олöмысь ставсö мамö босьтö сьöлöм бердас матö да унатор дойдö сiйöс ныж пурт моз. Ачыс сiйö некор эз лэптысь, зiльö овны сiдз, мед эськö быд лун мöрччис вежöрад да вöрзьöдiс ловтö. Таö велöдö и миянöс — ассьыс челядьсö.
Сiйö кужö вöчны быдтор, но медвылö пуктö семьясö да рöдвужсö. Семья вöсна дась бергöдны мусö и васö, мед сöмын ставöн вöлiны шудаöсь.
Эскö аслас вынъясö, дзебö сьöлöм чöсöдана дойсö, зiльö нимкодясьны весиг сэк, кор юр весьтас öшалö сьöд кымöр.
Шондi улыс эськö паськыд, но мам кодь йöзыс му вылас эзв этшаöсь, кыдзи этша кутiс лоны и бурыс. Татшöмъяссö колö видзны, натöг лоö гажтöм.
Со тайöс шöпкöдiс меным мамуклöн томдырся фотографияыс.
Топöда мамуклысь фотосö сьöлöм бердö да вашкöда: «Менам дона муса морт! Тэныд ставсьыс муöдз копыр. Ен мед водзö сетас тэныд ён дзоньвидзалун, уна вын-эбöс, радейтана удж да помтöм вермöмъяс!»
Анастасия ШЕШУКОВА.
Дон.