Май 22 лунö районö волiс республикаса Государственнöй Сöветöн веськöдлысь Игорь Владимирович Ковзель. Видзöдлыны, кутшöм отсöг вичмö районса администрациясянь татчö уджавны воысь том специалистъяслы, кыдзи сöвмö районын ичöт бизнес.
Медводз И.В.Ковзель пыралiс ас вылö уджалысь С.А.Липин дорö, кодi кольöм воын дорйис бизнес-бала да вичмöдöм грант вылö босьтiс пес пилитан да поткöдлан установка. Ачыс ньöбис самосвал. Шыöдчöны унаöн, торйöн нин кокньöд босьтысьяс.
Та бöрын И.В.Ковзель волiс предприниматель А.И.Кирушев дорö, кодi восьтiс мыжмöм водительяслысь мырддьöм машинаяс сулöданiн. Ачыс ньöбис эвакуатор. Но артмö сiдз, мый предприниматель сулöданiнсö кутöмöн унджык воштö нажöвитöм дорысь. Позьö гöгöрвоны, мый öдвакö кодкö кутас видзны сулöданiн ас тшöт весьтö. Ковмас жуглыны юр и райадминистрациялы, кыдзи корсьны петан туй, гашкö, отсыштны сьöмöн предпринимательлы, босьтны ас вылас кутшöмкö юкöн.
И.В.Ковзель сiдзжö сёрнитiс том специалистъяскöд, кодъяс локтiсны уджавны ас районö. Пасйис, мый районлы колö вöчны став позянасö, медым том йöз велöдчöм бöрын бергöдчисны чужанiнö. Оз кö лоны томъяс, сикт вочасöн бырас. Игорь Владимирович чуксалiс «вужъясьны» чужанiнö да сöвмöдны ас район. Госсöветöн веськöдлысь юасис, кутшöм мытшöдъяскöд паныдасисны том специалистъяс локтöм бöрын да кутшöм отсöг вичмис налы. Е.Ю.Власюк, Кулöмдiнса школаысь обществознание да право велöдысь, элясис, мый оланiн ньöбигöн ковмис босьтны ипотека сбербанкысь, кöть гоз-мöд во сайын республикаын дасьтылiсны Европаса ипотека программа, кодi буретш инмö том специалистъяслы да код серти колö этшаджык вештыны сьöм. Елена Юрьевна висьталiс, мый збыльвылас тайö программа серти босьтны оланiн он вермы.
Том йöз сiдзжö юалiсны, мыйла врачьяслы да фельдшеръяслы сетöны «подъёмнöй», а велöдысьяслы оз, мыйла оз могмöдны оланiнöн да с.в. И.Ковзель вочавидзис, мый государство оз вермы вичмöдны сьöм дзик быдöнлы öткодя, сiдзжö оз вермы быдöнöс могмöдны оланiнöн. Но, видзöдлыны кö мöдар боксянь, бöръя воясö вель ёна кыпöдiс тайö юкöнын уджалысьяслы удждон. Мед эськö морт ачыс тшöтш зiлис кыпöдны керка либö ньöбны оланiн.
Кутшöм отсöг вичмö том специалистъяслы районсянь, юöртiс райадминистрацияöн веськöдлысьöс вежысь Н.А.Левченко. Том специалистъяслы 3 во чöж быд тöлысь мунö оклад дiнö содтöд. Уджавны босьтчигöн врачьяслы сетсьö 1 миллион, фельдшеръяслы ― 350 сюрс шайт. Том специалистлы бергöдöны патера кöртымалöмысь вештöм сьöм, таысь кындзи, вештöны шоныд да би. 2012 воын вичмöдiсны 650 сюрс шайт Помöсдiнысь врач-педиатрлы оланiн ньöбöм вылö, 200 сюрс шайт 7 мортлы оланiн дзоньталöм вылö. 2013-2014 воясын урчитöма оланiн дзоньталöм вылö 12 мортлы 1200 сюрс шайт.
Аддзысьлöм бöрын И.Ковзель видзöдлiс кыпалысь выль сад да дзоньталöм культура керка. Велöдан управлениеса начальник О.А.Холопов юöртiс, мый тайö сад восьтöм да мукöд садъясысь челядьöс школаö лэдзöм бöрын юрсиктын садйö öчеред лоö ичöт. Висьталiс, мый выль сад воссяс сентябр 1 лун кежлö, уджалысьяс тырмöны.
Районса культура керка дзоньталiсны республика отсöгöн. Райадминистрацияысь культура да национальнöй туйвизь юкöнöн веськöдлысь Т.Н.Попова да культура керкаса директор К.Ю.Апостолиди нимкодьпырысь ошйысисны видзöдысьяслöн залöн. Висьталiсны, мый öнi быд вежон сцена вылын мунö кутшöмкö гаж. Шыöдчöны мукöд районъясысь котыръяс, вöзйысьöны волыны. Оз бöрыньтны некодöс. Т.Н.Попова вöзйис и водзö нуöдны республикаса программаяс, кытчö позьö сюртчыны да, районлысь сьöм тшöтш вичмöдöмöн, дзоньтавны культура керкаяс да клубъяс.
Ыджыд сёрни вöлi райадминистрацияын стрöитчöм да бизнес сöвмöдöм йылысь. Вöлiны ичöт бизнесö пырысьяс, райсöветса депутатъяс, овмöдчöминъясса юралысьяс, райадминистрацияысь юкöнъясöн веськöдлысьяс. И.В.Ковзель висьталiс, мый республикаын ичöт бизнес сöвмöдöм да сылöн мытшöдъяс Госсöветлöн видзöдлас улын. Кольöм воын 120 кымын мортлы вичмöдiсны ас делö восьтöм вылö грантъяс. Республика вичмöдö сьöм лизингысь вештöм сьöм бергöдöм, би йитöм вылö да с.в. Сьöм медводз вичмö налы, кодъяс сяммöны бура кутны бизнес. Тайö висьталöмкöд эз во öти кывйö видз-му овмöс министерстволöн районса юкöнöн веськöдлысь А.Р.Ярова. Сiйö лыддьö, мый медводз колö отсавны омöля олысьяслы. Талун зэв лёк серпас скöт картаяс кузя «Помöсдiн» да «Пожöг» кооперативъясын. Найö вöчöны став верманасö, но отсöгтöг скöт картаяс оз лоны.
Районса юралысь Д.А.Шатохин тöдмöдiс чукöртчысьясöс, мый кыпöдасны районын локтан воясын: Донын социокультурнöй шöрин, (öти вевт улын лоасны спортзал да культура керка), юрсиктын коми культура шöрин, батьтöм-мамтöм челядьлы кык патераа керка. Кöсйöны кыпöдны керкаяс предпринимательяс отсöгöн. Тадзсö сувтас донтöмджык. Сёрни мунiс и вöр колясъясысь брикетъяс вöчалöм йылысь, медым из шомöн ломтысянiнъяс вуджöдны на вылö.
И.В.Ковзель аддзысьлiс районса депутатъяскöд. Сiйö тöдчöдiс, мый районлöн олöм сы сайын, кыдзи уджалöны власьт да депутатъяс. Колö уджавны öтув, могыс öти ― бурмöдны йöзлысь олöм. Депутатъяслы колö бура тöдны бöрйысьысьяслысь тöжд-могъяс да вайöдны найöс Госсöветöдз, пыртны законъясö олöм бурмöдысь вöзйöмъяс.
Госсöветöн веськöдлысь кывкöртiс, мый бурыс районын уна, да сиис районса юралысьлы, райадминистрациялы, райсöветса депутатъяслы водзö сöвмöдны район.