Пузла посёлокын кызь сайö во уджалö «Комилесбизнес» котыр, быд во заптö 100 сюрс гöгöр кубометр вöр. Но вермас артмыны сэтшöмтор, мый Пузласа лесничестволöн вöръяс веськаласны вöр заптысь бокиса котыръяслы, и посёлок-ысь кызвыныслöн бырö удж. 
Ми лыддям, мый оз позь сетны кöртымö 10-19, 38-47, 67-78, 84-106 кварталъяс. Сэнi бöръя 7-10 воöн ёна босьтчис быдмыны сус — öти гектар вылын кык да джын сюрс пу. 126-163 кварталъяс колö кольны пузласаяслы вöдитчöм да ичöт бизнеслы аукционъяс пыр кöртымö сетöм вылö. 
Бöръя 27 воöн нинöм бурыс Пузлаын, позьö шуны, эз вöв. Абу бур школа, клуб, ёнмöдчанiн. Щитъясысь тэчлöм кутшöмсюрö керкаяс киссянвыйынöсь, йöз регыд колясны оланiнтöг. 
«Монди СЛПК» заптö вöр Пузласянь дас километра ылнаын да петкöдö Сыктывкарö машинаясöн. Сьöкыда сöвтчöм вöсна киссьö туй да Вöльдiн дорын понтон. Абу ён пыркадся пос да ми быд во кык-куим тöлысь кежлö кольлам дi вылö. Тадзи кö кутасны петкöдны вöр и водзö, туйыс да понтоныс дзикöдз пракмунасны. Районса да республикаса власьтъяс миянлысь майшасьöмнымöс оз кывны, вежны мыйкö бурланьö оз кöсйыны. 
Пузла грездын олысьяс сёрнитöны та йылысь чукöртчылiгъясöн матö вит во нин. Ми шыöдчам республикаса вöр овмöсöн веськöдлысьяс дорö, медым Помöсдiнса лесничестволöн Пузласа юкöнысь вöр фонд сетiсны кöртымö эз бокиса вöр заптысьяслы, а сöмын «Комилесбизнеслы», кöнi уджалöны Пузлаысь кызвын олысьыс. 
Чайтам, мый миянöс кыласны, гöгöрвоасны да мунасны воча. 
Пузласа олысьяс нимсянь 
Александр Уляшев.