Тавося öкмыс тöлысьöн участокъясса уполномоченнöйяс видлалiсны 2868 шыöдчöм да элясьöм. Медся унаöс, 502-öс, Кулöмдiнын лöнь олöм вöсна тöждысьысь Андрей Валерьевич Микушев. Бур уджысь пытшкöсса делöяс кузя министерстволöн районса юкöн сiйöс полицияса капитансянь кыпöдiс майорöдз. 
А.В.Микушев участокса уполномоченнöйöн уджавлiс Кöрткерöс районын. 2009-öд воын локтiс миян районö да пырис ГИБДД-лöн юкöнö, 2013-öд восянь участокса уполномоченнöйяслöн юкöнын. Медводз уджалiс «Немдiн», а сэсся «Зимстан» да «Улыс Воч» овмöдчöминъясын. Öнi уполномоченнöялö юрсиктын. Уджалысьяс оз тырмыны да зiльö кык пыдди. Дежуритан юкöнö кö воö кутшöмкö лоöмтор йылысь юöр, туйö петö лун кöть вой. Юасьö, лöсьöдö гижöд да вöчö кывкöртöд. Сьöкыд мыж вöчöмысь гижöд сетö туясьысьяслöн либö дознаниелöн юкöнъясö. 
Сылöн участокын видзöдлас улö веськалöм уна морт да век ытшовтö найöс. Сiдзжö видзöдö, мед колана ногöн видзисны öружие да пуля-порок вöралысьяс. Сы дорö шыöдчöны найö, кодъяс вöдитчöны öружиеöн, кодъясöс майшöдлö войын лöньлун торкöм, понъяслöн шöйтöм. Уджалö туялысьяслöн да оперативникъялöн котыркöд. Сёрнитö йöзкöд, волö уджалан котыръясö, школаö. 
Андрей Валерьевич туйдö да велöдö томъясöс, кодъяс локтöны юкöнö да кöсйöны лоны участокса уполномоченнöйöн. 
Гижöд да снимок Марина ДАДАШОВАЛÖН.