— Майсянь нин мавталам-зэвтам оборудованиелысь став юкöнсö, мед лоны дасьöн туйяс дзоньталiг-вöчиг кежлö. Таво миянöн вöчöм асфальт вольсалiсны Немдiнса, Мысса, Дон сайса, Дереваннöйса туйяс вылö, мунiс и Кулöмдiнын гуранъяс тыртöм вылö. Öнi вöчам юрсиктын выль школа дорö пыран туй вылö, а сэсся сувтам. Гожöмбыдöн вöчим 25 сюрс тонна асфальт. Тöлын уджалам ломтысянiнын, — сёрнитiс туйяс вöчан да дзоньталан Кулöмдiнса юкöнысь асфальт вöчан заводса оператор Сергей Александрович Батманов. 
Сы кындзи, танi уджалöны битум куим шонтысь, сваритчысь, электрик, операторлы отсасьысь да рабочöй. 
Лыа, посни, шöркодь да гырысь из, галяиз чукöръяс. Ставсö торйöн кисьтöны бункеръясö да сэсянь найö визь кузя веськалöны сiдз шусяна барабанö, кодi бергöдлö, косьтö-донöдö воöмсö. Элеватор пыр кайö вывлань да грохот-машинаöн ставыс пожнавсьö. Дзоляджык нин бункеръясö торйöн веськалöны лыа, из, галяиз. Сэсся программа серти, уна-ö мый колö, öтлаö и киссьö. Сэтчö содтöны минеральнöй порошок, пöсь битум да бара ставсö гудралöны, и артмö асфальт. Вöчöмсö кисьтöны машиналöн кузовö да нуöны туйяслöн юкöнъяс вылö. Туй овмöс уна сикас техникаöн вольсалö, шыльöдö, топöдö вайöмсö. 
Сергей Александрович абу сöмын бур да кывкутысь уджалысь, но и бур сьылысь. Школаын велöдчигöн котралiс районса культура керкаö, петкöдчис гажъясын. Сэтчö жö локтiс армияын служитöм бöрын. Сьылö нылыскöд нин. Тавося июньын «Вип кодзув» гаж дырйи сьылiс Кулöмдiнса МТС котырöн веськöдлысь О.Ф.Маслинскаякöд да лоисны медводзын. Найöс жö вылö донъялiсны видзöдысьяс. 
Гижöд да снимок Марина ДАДАШОВАЛÖН.