Декабрь 13-17 лунъясö Коми республикаса вужвойтырлöн шылада-драмаа театр кытшовтас петкöдланторъясöн матö став районнымöс: волас Кулöмдiнö, Помöсдiнö, Керчомъяö, Югыдъягö, Кужйö, Ручö, Немдінö, Зимстанö. Ворсысьяс петкöдласны челядьлы Николай Щукинлысь «Нёрымö-дядьö» мойд, верстьöлы Геннадий Юшковлысь «Му югыдöй менам» теш. 
Кывлiм, мый тайö теш вылас театрö öткымын видзöдысь, воöма сьöлöм вылас да, ветлöма мöдысь и коймöдысь. Гöгöрвоана: тайö öд коми драматургиялöн классика. И серамбана, и сьыланкывъяса. Тайö петкöдланторйыс сё во сайся олöм йылысь, кор зэв дыр служитöм бöрын сиктö воö Иван салдат. Сiйöс виччысьöмаöсь кык ань. Oгрö – верöс сайö петавтöм да видзöдö асавны Иванöс. А Йöвдöкеялöн эм верöс сайö петан када ныв. Кодлöн керкаö му югыдыс воас?.. Пасъям, мый тайö ворсöмын петкöдчö миян районысь петöм Владимир Уляшев. Сылöн Пывсян Семöыс дзик тешкодь морт. Владимир ворсö сэтшöм збыльысь, мый сылы эскан. Семöыс и юыськодь, и лэдзчысьöма, и йöзöн вöдитöм пывсянын пыр сöстöммöдчö, а жалитан да бур ногöн сералан, эскан, мый сiйö кужас на овны бура. Сiдзжö ворсöны республикаса народнöй артистъяс Валентина Соколова, Галина Подорова, Александр Ветошкин, республикаса пыдди пуктана артисткаяс Алёна Сметанина, Зоя Осипова, государственнöй премияа Андрей Засухин, артист Александр Канев. 
Театрын уджалöны сiдзжö миян районысь петöм кык ань – Альбина Карманова да Анна Попова. Кулöмдiнса куим ворсысь — республикаысь государственнöй премияöн пасйöмъяс. 

Лидия ЛИПИНА. 
Шылада-драма театрлöн снимок вылын: ворсöмысь юкöн.