Декабр 1-2 лунъясö Сыктывкар бердса Ыбын финн-йöгра шöринын мунiс «Райда» республикаса конкурс. Каръясысь да районъясысь петкöдчис 13 мича ныв. Миян районысь ветлiс Кужйысь Светлана Логинова, кодi вермис район тшупöдын. Республикаса сцена вылö петiгкежлö сiйöс дасьтiс, позьö шуны, став район. «Коми войтырлöн» районса представительство чукöртiс сьöм пасьтöдöм-кöмöдöм вылö, мича костюм вурисны районса культура керкабердса вурсьысьяс И.И.Наумик да А.С.Гичева, сьывны да нуöдны коми öбрадъяс велöдiсны Е.В.Сенькина да К.Ю.Апостолиди. Öтувъя отсöг эз ло весьшöрö: Светлана дзирдыштiс мичлунöн, статьöн, сцена вылын кутчысьны кужöмöн, ыджыд мывкыдлунöн да Интаысь Александра Макарова бöрын лоис мöдöдöн. Кöть конкурслöн быд юкöнын нывъяскöд сцена вылö петалiсны налöн отсасян котыръяс, а Светлана дорйысис öтнас. Сылы вичмисны республика юралыссянь да мукöд чина йöзсянь аттьöалан гижöдъяс да козинъяс. Локтан воын Светлана Логинова да Александра Макарова петкöдчасны «Войвыв кодзув» финн-йöгра регионъяскоста конкурсын. Сиам бергöдчыны вермöмöн.