Миян Победа

[ A+ ] /[ A- ]

Гижышта Дереваннöйын Победалысь лун пасйöм йылысь. Сiйö таво артмис аслыспöлöсöн. Асывнас сизим час да джынйын ставнымлысь пыдзыртiс сьöлöмнымöс, вазьöдiс син доръяснымöс военнöй ногöн лöсьöдöм кöкъямыс машиналöн сикт кузя флагъясöн мунöмыс да тутсöмыс. Ветлiсны посёлокöдз да бöр мунiсны кывтыдöдз. Сэсянь локтiсны «Кувлытöм полккöд» усьöмъяслы пас дорöдз. Война йылысь сьыланкывъяс гораа кылiсны Михаил Булышевлöн машина вывсянь. Сы улö восьлалiсны Кывтыдса, Илья сиктса, Амбар дорса, Вичкодорса, Ягвывса, Пöжöмса олысьяс. Морöс бердас быдöн кутiс фотографиясö аслас батьлысь, мамлысь, пöльлысь, ыджыд батьлысь, дядьлысь, чожлысь, мукöд ас вужлысь. Пас дорын öтлаасисны посёлокса школакöд да сэтчöс «Кувлытöм полккöд». Пыдди пуктана караулö сувтiсны гырысь класса велöдчысьяс, мукöдъяс пуктiсны дзоридзьясысь да пу лапъясысь кытш, дзоридзьяс. Сьылiс олöмаяслöн «Парма шыяс» котыр, петкöдчисны велöдчысьяс. Войнакадся челядьдырсö казьтылiс Рем Фёдорович Ракин. Чолöмалiс ставнысö сиктса юралысь Елена Васильевна Булышева. Асывнас зэрыштiс, ывлаыс быттьö бöрдiс, тöлалыштiс. Та вöсна енэжö лэдзöм шаръяс небыдика пуксисны пасдорса кыдзьяслöн вожъяс вылö. Быттьö сиктса фронтöвикъяслöн ловъясныс эз кöсйыны лэбзьыны-мунны муса чужан сиктсьыныс. А сэсся тöлыс лöньыштiс, петiс яръюгыд шондi. Йöзöс вердiсны яя рокöн, юктöдiсны пöсь чайöн. Чöскыд роксö пуöмысь ыджыд аттьö Ия Анатольевна Кунцлы.
Уна йöза вöлi усьöмъяслы пас дорын и май 9 лунся рытын. Кодi кöсйис, сiйö и сьылiс шылад бöрся войнакадся сьöлöм вöрзьöданторъяс. Аттьö гудöкöн гажöдысь Иван Николаевич Тюрнинлы. Йöз сьылiсны и йöктiсны, öд гудöк шысö öнiя кадö кывлöны гежöда.
Дас часын енэжсö серпасалiс уна рöма салют. Йöз нимкодясисны, горзiсны «Ура!». Олöма йöз чышкалiсны синванысö — бöрдiс сьöлöмныс.
Коляс кöть сё, кöть сюрс во — тайö вир кисьтана вöвлытöм тышыс, Великöй Отечественнöй войнаын миян Победаным некор оз вун.
Сиктсаяс нимсянь висьтала зэв ыджыд аттьö асланым юралысь Елена Васильевна Булышевалы, кодi сяммис котыртны ставсö тайöс, миянöс, сиктсаясöс да посёлоксаясöс, кыпöдöмöн. Торйöн нин коляс йöзлöн вежöрö машинаяслöн мунöмыс, кодi вöлi дзик выльторйöн да шензьöдiс ставнымöс. Аттьö ставлы, кодi олiс Победаöн!
Татьяна УДОРАТИНА,
библиотекар.
Дереваннöй.
Снимокъяс вылын: мунöны «военнöй» машинаяс; восьлалö «Кувлытöм полк».


Комментарии:

Добавить комментарий

Свежий выпуск: за 18 октября