Вöр овмöсын уджалысьяс костын республикаса конкурс вылын Помöсдiнса лесничествоысь Артём Михайлович Шомысов лоис тайö воын медся бур лесникöн. Сылы и вичмисны медшöр козинъяс — кубок да «Буран». Нёльöд во на и уджалö, а кыкысь нин петкöдчылiс республикаса ордйысьöмъясын. Коймöдысьсö, таво, вермис. Уджалан сям да тöдöмлун колiс петкöдлыны конкурслöн дас тшупöдын: кадöн разьны да чукöртны бензопила, уджавны сiйöн да мотопомпаöн, öзтыны бипур да с.в.
-Дерт, медся сьöкыд вöлi зэра да тöла поводдя дырйи куим спички тувйöн пестыны бипур. Но менам сiйö кокниа артмис, кыдзи кокниа сетчисны и мукöдторъясыс, — висьталiс А.М.Шомысов.
Том специалист тöждысьö да дöзьöритö Помöсдiнса лесничествоысь Вöльдiнса участок.
Пасъям, таво конкурсын ордйысисны и лесничествоöн веськöдлысьяс. Куим морта куим котыр пиын медбурöн лоис лунвыв районъяслöн котыр, кöнi вöлi Немдiнса лесничествоысь Владимир Паршуков. А бипур медся бура öзтiс Кулöмдiнса лесничествоысь Алексей Турьев.
Снимок вылын: А.М.Шомысов.