Мамлöн сьöкта серти, а сiйö пыр стöча кутчысис 41 килограмм, лесхозын лöсьöдлiсны торксьöм гираяса кöрт вески.

[ A+ ] /[ A- ]

Гортын видзлiс лесхозса Дуня вöлöс, кодöн кытшлавлiсны вöр юкöнъяс да чукöртлiсны кольяс. Дуня кö волiс öтнас, мам шулывлiс: «Трасича, Митрей Ёгор бара на юöма, вай ветлам корсьны». Вöв кöк туйöд сэсся и мунлiм, — казьтывлiс Александра Павловна Игнатовалöн олöм йылысь Нина Егоровна нылыс, кодi öнi видзö мамсö. 
— Кор вöлiм дзоляöсь, ыджыд мамöй миянлы пыр сьывлiс война да революция йылысь сьыланкывъяс. Миянлы, пöчöн да ыджыд мамöн сизим шуысьлы, пыр висьтавлiс выль мойдъяс, — водзö сёрнитiс Людмила внучкаыс. 
Унатор на висьталiсны, казьтылiсны Выльгортын олысь Александра Павловна Игнатова йылысь, кор октябр 27 лунö чукöртчылiсны чолöмавны сiйöс 90 арöс тырöмöн. Ань чужис Сыктыв районса Межадорын. Батьыс веськöдлiс колхозлöн правлениеöн, мамыс уджалiс колхозас жö. Налöн вöлi квайт челядь. Александра Павловналöн Иван Павлович Морозов вокыс вöлi Коми АССР-лöн партия обкомса медводдза секретарöн. 
Ань сизим класса школа помалöм бöрын Койгортын велöдчис тшöтайтчысьö-бухгалтерö. Уджалiс Койгортса ОРС-ын. 1950 воын сiйöс вуджöдiсны Помöсдiнса ОРС-ö старшöй бухгалтерöн. 1954 восянь 1985 воöдз пенсия вылö петтöдз уджалiс Помöсдiнса лесхозын медшöр бухгалтерöн. Лесхозын жö уджавлiс Егор Дмитриевич верöсыс. Сэтчö пырис и Николай Егорович пиыс. Ань верöсыскöд чужтiсны да ас олöмö петкöдiсны нёль челядьöс. Öнi сылöн сизим внук-внучка, 17 правнук-правнучка да öти праправнучка. Александра Павловнаöс тшупöда пасöн ыдждöдлiс да Россияса президент В.В.Путинсянь чолöмалан гижöд сетiс районса администрацияöн веськöдлысьöс вежысь Н.А.Чаланова, нимöдiсны олöмаяслöн районса котырöн юрнуöдысь Г.А.Кравченко, Помöсдiнса юралысь А.Е.Уляшев, олöмаяслöн Выльгортса котырöн веськöдлысь М.Е.Гаевская, матыссаяс, рöдвуж да тöдсаяс. 
Гижöд да снимок Марина ДАДАШОВАЛÖН.


Комментарии:

Добавить комментарий

Свежий выпуск: за 23 ноября