Паськыда да кыпыда пасйис май 9 лун «Тимшер» овмöдчöмин.
Победа лунöдз на мунiсны «Георгиевскöй ленточка», «Нуа ветеранöс», «Мыйöн вермам, сiйöн и отсалам» паса уджъяс. Школаын нуöдiсны Великöй Отечественнöй войналы сиöм класса часъяс. Май 9 лунö клубын петкöдчисны «Сьыланкывкöд олöм чöж», «Сударушка» да челядьлöн котыръяс.
Май 9 лунö Великöй Отечественнöй война вылын усьöмъясöс казьтылан пас дорын Тимшерса шöр школаын велöдчысьяс сулалiсны пыдди пуктана караулын. Посёлоксаяс, матö 290 морт, восьлалiсны уличьяс кузя «Кувлытöм полккöд». Чукöртчылöм бöрын клубын мунiс «Победа вöсна!» гаж, кöнi петкöдчис посёлокса кöкъямыс котыр. Видзöдысьяс нимкодя вочаалiсны медся ичöтъясöс — «Ёлочка» садйысь нывкаясöс да зонкаясöс, кодъяс сьылiсны «Катюша». Налы вичмис юмов козин, мукöд петкöдчысьяслы — дипломъяс. Сiдзжö тайö лунö быд кöсйысь вермис сёйны салдатлысь рок.
Тылын уджалысьяслы козинöн лоис «Ветеранлы — ловъя открытка» нима удж. Овмöдчöминса юралысь В.Белова, олöмаяслöн котырöн юрнуöдысь Г.Паршукова, социальнöй уджалысь М.Костровская да 6-öд класса велöдчысь Д.Михеев волiсны гортöдзныс тылса быд уджалысь дорö. Данил лыддис кывбур, ставöн öтвылысь сьылiсны «Катюша».
Валентина БЕЛОВА,
«Тимшер» овмöдчöминса юралысь.
Гижысьлöн снимок вылын: тылын уджалысь А.Д.Кирстöс чолöмалöм.