Апрель 23 лунö «Юрган» телеканал вылын веськыд эфирын республикаса олысьяслöн юалöмъяс вылö вочавидзис Коми республикаса юралысь В.М.Гайзер.
Вöлi 40 гöгöр юалöм, и телефон, и видеойитöд пыр. Таысь кындзи, «веськыд йитöд» вöлi Сыктывдiн районса Выльгорт сикткöд. Сэтчöс олысь В.Ермолина юалiс, мыйла врачьяслы да фельдшеръяслы, велöдчöм бöрын кö найö мунöны уджавны сиктö, сетсьö овмöдчöм вылö сьöм, а медсестраяслы оз, кöть эськö кöнсюрö найö вöчöны фельдшерлысь уджсö.
«Врачьяслы «подъёмнöй» сетöм ― тайö Россияса президентлöн индöд. Сiйöс примитöм бöрын республикаса правительстволöн индöд серти сьöм кутiм вичмöдны и фельдшеръяслы, сы вöсна мый буретш тайö специалистъясыс ёна колöны. Колö вöчны сiдзи, медым бурдöдысьяс окотитiсны локны сиктö. Ме казьтышта, врачлы сетсьö миллион, фельдшерлы ― 350 сюрс шайт», — гöгöрвоöдiс В.Гайзер.
Юралысь пасйис, мый та кузя серпасыс вежсис бурланьö: «Сöмын 2012 воын тайö сьöмсö босьтiсны 62 врач да 10 фельдшер. Но ме сувта сы дор, мый колö отсавны сьöмöн бурдöдан юкöнысь мукöд специалистъяслы, торйöн нин налы, кодi сяммö вöчны сiйö жö, мый и фельдшер, и, ковмас кö, вежны сiйöс».
В.Гайзер сетiс дзоньвидзалун министерстволы индöд видзöдлыны, лоас-ö республикаса бюджетын сьöм, медым сетны «подъёмнöй» и медсестраяслы.
Коми республикаса юралысьлöн
да правительстволöн пресс-служба.