Россияын унатор нин пыртiсны-вынсьöдiсны, мед йöз юисны омöльджыка. Оз позь вöчны коддзöданторъяс вылö реклама. Тыр арлыдтöмъяслы спирт сораса юантор вузалöмысь штрап содiс 50 сюрс шайтöдз. Гортын коддзöдантор вöчöмысь да сiйöс вузалöмысь кыскöны уголовнöй кывкутöмö. Оз позь вина-сурöн вузасьны войын, кöнсюрö и рытын. Государство пыр кыпöдö коддзöдантор вузалöм вылö акцизъяс. Госдумаын дасьöсь видлавны законлысь бала, код серти вина-водка, градуса мукöд юантор кутасны вузавны 21 арöссянь. Дзоньвидзалун кузя Россияса министр ошкис тайö мöвпсö, но шуис, мый сiйöс медводз колö гöгöрбок донъявны. Донъялöны и районса йöз. 
Н.А.ЛЕВЧЕНКО — районса администрацияöн веськöдлысьöс вежысь, наркотикъясöн дурмöдчöмлы да юöмлы паныд сулалысь комиссияöн веськöдлысьöс вежысь: 
— 18 арöса зон челядь руа на. Буретш 18 арöсöн мунöны армияö, служитiгöн верстяммöны, вежöрсялöны, налöн вежсьö олöм вылас видзöдласыс. 21 арöсöн кодъяскö гöтрасьöны нин. Эм кö семья да челядь, эм и код вöсна тöждысьны да öдвакö мортыс сетчас лёкö. Чайта, колö содтыны коддзöдантор вузалöм вылö арлыд. 
С.И.ПОПОВА — Сыктывкарса ликёро-водочнöй заводлöн Кулöмдiнса вузасянiнöн веськöдлысь: 
— Вынсьöдiсны закон, мый градуса юанторъяс позьö вузавны сöмын 22 часöдз. Сэкжö тайö эз инмы ресторанъяслы, баръяслы, кöнi гажöдчöны кык час войöдз. Тышкасьны кö юöмкöд, мед эськö законсö öткодя лöсьöдiсны ставныслы. Ме серти кö весьшöрö мöвпалöны кыпöдны коддзöдчантор ньöбöм вылö арлыд. Кодлы колö, тшöктас, да сылы босьтасны йöз. 
Л.В.ИГНАТОВА — асшöр уджалысь, лавка кутысь: 
— Арлыд содтöм оз сувтöд юöмысь. 20 арöсалы он вузав, сiйö ыстас ньöбны кодöскö. Кольöм нэмын, кор вöлiны совхозъяс, став томуловыс отсасис сэнi. Скöтöн олiсны и ас овмöсъясын. Челядь уджавлiсны верстьöкöд радын. Быдмигöн эг аддзылöй, мед томъяс, верстьö луншöра лунын летйысисны код юрöн сикт шöрын. Да и ставныс уджалiсны. Лавкаясын коддзöдчантор вузавлiсны 11 чассянь. Мортыслöн кö вöлi пöкмелля, уджалöмнас и петлiс. Вынсьöдiсны «кос» закон, да йöз юисны одеколон, клейысь на кыдзкö вöчлiсны коддзöдчантор, «гажа» олöмлы восьтлiсны мöд туй. Сикт-посёлокъясын колöны уджаланiнъяс, и мед томъяслы туй вöлi восьса быдлаö, мед вöлi кытчö петны прöст кадö, сэки эськö эз ков жуглыны юр, кыдзи водзсасьны юöмкöд. 
Н.Е.ШАТОХИНА — олöмаяслöн Дiасёръяса котырöн юрнуöдысь: 
— Чайта да, арлыд колö содтыны. 14 арöсöн сетöны паспорт, 18 арöсöн мортыс тыр арлыда нин да позьö гöтрасьны либö петны верöс сайö. Но найö сiйö кадын оз на тырвыйö гöгöрвоны олöмсö. Армияын мортсяммасны, гöгöрвоасны да ас саяныс нин, юны али абу. Но вынсьöдасны кö арлыд содтöм кузя видлаланторсö, мед лавкаясын эз вузавны и коддзöдан коктейльяс. 
А.Е.ИГНАТОВА — вöвлöм велöдысь: 
— Öнi ёна ышмöны томъяс. Вынсьöдасны кö тайö вöзйöмсö да 10 морт кö öвсяс, дугдас юны, и то бур. Но чайта да, сюрасны на вузасьысьяс, кодъяс кутасны сетны гусьöн. И мед сöмын топöдöмысь томъяс эз аддзыны мöд петан туй. Эг на вунöдöй, кор коддзöданторъяс босьтны лöсьöдлiсны талонъяс. Ньöбавлiсны весиг ютöм йöз. Тыра штопъяс «чипсiсны» да абу гусятор, мый кодсюрöыс юсисны. Сэсся ставыс бать-мам сайын, кыдзи найö быдтöны-велöдöны челядьнысö, кыдзи олöны семьяын. 
П.Н.ЛЮТОЕВ — Кулöмдiнысь зон: 
— Томъяслöн вир-яйыс пö сöвмö 25 арöсöдз да кода юанторъяс ньöбны арлыд содтöм — бур вöзйöм. Но медся бур, томъяслы кö лоас удж, быд сикт-грездын лоасны найöс ышöдысьяс-котыртысьяс, лоас кöнi чукöртчыны, гажöдчыны, ёнмöдчыны. Сэки öдвакö шыбöлитас томъястö.

Марина ДАДАШОВА.