Пыр тшöкыдджыка йöз сёрнитöны, мый регыд 9-öд да 11-öд класс помалысьяс кутасны сдайтны нöшта английскöй кывйысь экзамен. Велöдöм да наука кузя министр Ольга Васильева висьталiс, мый тайöс пыртасны 2022 воын. Мый мöвпалöны та йылысь англия кыв велöдысьяс, бать-мам да асьныс челядь? Та вылö вочавидзисны: 
Елена Ивановна Липина — Кулöмдiнысь кык челядя мам, англия кыв велöдысь: 
— Англия кыв велöдны бур, но оз быдöнлы сетчы. Сiдз нин челядь вылö «öшöдiсны» уна да налöн зэв этша кад кольö аслыныс. Ме чайта, мый тайö экзаменсö унаöн оз сдайтны. Быть сдайтöдны оз ков. Ми таöдз эг на «быдмöй». 
Анастасия Александровна Уляшева — Помöсдiнысь уна челядя мам, англия кыв велöдысь: 
— Тайöс вöчны оз ков. Кодлы колö, ачыс босьтчас, дасьтысяс да сдайтас. Ёна нин мудзи школаын уджаланног вежлалöмысь. 
Да и öнiя ногöн экзамен сдайтöм оз тырвыйö петкöдлы тöдöмлунъяс. Колö сдайтны экзаменъяс воддза моз. Оз ков видзöдны Рытыввывса странаяс вылö да босьтны ставсö налысь. 
Валерия Тимушева — Шöръягысь 10-öд классын велöдчысь: 
— Быдöнöс сдайтöдны оз ков, сы вöсна мый оз быд школаын велöдны бура. Сэтчö жö тайö кывйыс сьöкыд да ме, пример вылö, велöдны ог радейт. 
Мария Острейковская — Кулöмдiнысь 9-öд класса велöдчысь: 
— Бура кö велöдны да гöгöрвоны кывсö, то сьöкыдыс оз ло. Морт кö водзмöстчö да тайö предметыс колö водзö велöдчыны пырöм могысь, пуктас став вынсö. Но тайö кывйыс сетчö сьöкыда да сьöкыдлунъяс лоасны. 
Екатерина Нестерова — Кулöмдiнысь 8-öд класса велöдчысь: 
— Миянлы велöдысьяс висьталiсны, мый лоас татшöм экзамен. Ме серти, миян классын быдöн сдайтны оз вермы. 
Мария Тарабукина — Паспомысь кык челядя мам: 
— Тайö — челядьлы дзик ковтöмтор. Сьöлöм висьö, мый оз пыдди пуктыны чужан кыв да сiйöс пыдiсянь велöдöм пыдди кыпöдöны йöз кыв. Уналы тайö кывйыс оз и ковмыв, а чужан кывйыд колö век. 
Елизавета Нестерова — Сыктывкарса госуниверситетын йöз кыв велöдан факультетса 4-öд курсын велöдчысь: 
— Ме ногöн, лоö сöмын бур, вöчасны кö быть сдайтанаöн англия кыв. Öнiя кадö сiйö зэв колана. Экзамен сдайтны, дерт, сьöкыд, но, видзöдлыны кö мöдар боксянь, öнi пыртöны быдторсö: интернетын быдпöлöс сайтъяс, телефонын приложениеяс. Велöдны кö сьöлöмсянь, то сьöкыдлунъяс оз лоны. Ме серти, челядь сдайтасны, кöть нин медся этша балл вылö. Кывсö велöдöны мöдöд классянь да мыйтакö тöдöны нин. Медся ыджыд сьöкыдлуныс сыын, мый челядь этша сёрнитöны англия кыв вылын, сöмын урок дырйи. 
Дарья Пименова — Ручысь 11-öд класс помалысь: 
— Кöть öнiя кадö быдлаö колö англия кыв, унатор тайö кыв вылын компьютерын, ме чайта, вöчны быдöнлы сдайтанаöн оз ков. Кодлы колö, мед бöръясны асьныс. Миян школаын велöдöны француз кыв. Ме велöдчи сы кузя бура, весиг ветлi олимпиадаяс вылö, но тайö предметыс сьöкыд, колö ёна уджавны. Гортын эм кывчукöр да ёна отсалiс сiйö. 
Галина Клюжева.