Кыдзи чукöртны кагаöс школаö?

Матысмö медводдза велöдчан лун. Бать-мамлöн коли этша кад, медым лöсьöдны школа кежлö кагаöс. Мый колö кутны тöд вылын, кор ньöбан челядьлы ручкаяс да пенал? Кыдзи бöрйыны ранец, медым сійö эз висьмöд велöдчысьлысь мыш? Та йылысь и сёрнитам талун.

Медводз, дерт, колö ньöбны портфель. Позьö босьтны кöть портфель, кöть ранец. Колö, медым сылöн мышкыс вöлi чорыд, ортопедическöй. Сійö оз сэтшöма сьöктöд кагалысь мыш. Сідзжö колö кутны тöд вылын, медым портфельö вöлi пасйöма войын тыдалысь визьяс. Бур, портфельлöн пыдöсыс кö пластикысь. Колö, медым портфельыс йигнасис эз молния вылö, а сiйöс позис кизявны. Молнияöн кага вермас топöдны чунь. Медводдза классö мунысьлы тырмас сумкаас 3 юкöн. Öтикас лоасны небöгъяс, мöдас – тетрадьяс, коймöдас – ручкаяс.

Кымын зепта портфель колö ньöбны? Колö, медым вöлі ва видзан, телепон да бутерброд пуктан зепъяс. Унджыкыс оз ков. Оз öд кузь туйö мун тiян каганыд.

Портфель сьöктасö сiдзжö колö артавны, мед сiйö вöлі кагалöн сьöктаысь 15 прочент сöмын. Шуам, кага кö 20 килограмм сьöкта, сумкаыслöн сьöктаыс мед эз вöв унджык 3 килограммысь. Ранецсö бöрйöй кагакöд тшöтш, медым стöча видзöдлыны, топыда-ö куйлö мышкыс, лöсялö-оз сюрса лыыслы.

Мый колö пуктыны портфельö? Тетрадьяс, пластилин, альбом, краскаяс, карандаш, артасян бедьяс, клей, пломастер, линейка, вуштысян резинка да ножич. Колö, медым ножичлöн йылыс вöлі гöгрöс, тадзи кага оз дойдав асьсö.

Öні вузасьöны дась пеналъяс, кöні ставыс нин эм – пломастер, карандаш, ручка да вуштысянъяс. Сöмын энö вунöдöй, мый ставсö колö ньöбны запасöн. Öд найö тшöкыда вошласьöны да чегъясьöны.

Кутшöм карандаш бöрйыны? Унаöн чайтöны, мый бурджык ньöбны вуштысян резинаа карандаш. Но ми лыддям, мый татшöм карандашöн вöдитчыны оз позь. Öд вуштысян öдйö бырö, кольö сöмын кöрт тор, кодöн кага вермас доймыны. Пеналö колö пуктыны и карандаш, и вуштан.

Кутшöм тетрадь бöрйыны? Первоклассникъяслы колö босьтны 12 листа тетрадь. Медым сэні вöліны синмö шыбитчан визьяс либö клеткаяс, мед кагалöн синъяс оз мудзны. Энö ньöбöй вывті мича тетрадь, альбом либö портфель, тадзи кага кутас ылавны велöдчöмысь. Но дерт, колö медым кагалы аслыс кажитчис школаö новлöдлан кöлуйыс.

Кутам лача, мый тайö индöдъясыс отсаласны тiянлы! Видзöй асьнытö да ассьыныд дзоньвидзалунтö!

Биысь видзчысян служба да войтырöс доръян республикаса веськöдланiн