Кужйын

[ A+ ] /[ A- ]

Кужйын
* Куж Эжва юлöн веськыд берегын. Чужис 1629 во бöрын. Гижöмöн медводдзаысь казьтыштöма 1646 воын.
* Öнi Кужйын 385 морт. На лыдын 196 нывбаба да 189 айлов. 80 арöсысь ыджыдджыкöсь куимöн. Öти салдат дöва — Мария Александровна Кузнецова. Уджалысьыс 80 морт. Найö школаын, садйын, лавкаясын, районса электрическöй сетьын, администрацияын. Тöв кежлö босьтлö уджавны вöрын «Барс» котыр. Уджöн могмöдан шöринын учёт вылынöсь 17-öн. Оз сулавны 23-öн. Удж абутöм вöсна кодсюрö мунö бокö, но кызвыныслы чужанiн меддона.
* Таво юргис нёль кöлысь. Том гозъяяс олöны бать-мамкöд öтлаын, керка некод оз лэпты. Кыпöдлiсны бура важöн кыкöс, но эз на помавны. Сэкжö керка лэптыны позьö: вöр сюрö матысь, вайöмöн вермас отсавны «Барс» котырöн веськöдлысь, райсöветса депутат, ас сиктса морт Р.В.Третьяков.
* Таво чужис нин 6 кага, кувсис кык морт.
* Сиктса том йöзлöн котыр районын медбуръяс лыдын. Салдатпуяс бура петкöдчисны «Призывник-2012» конкурсын, шедöдiсны медводдза места.
* Кужйын 196 овмöс. Кöть эм уна видз да му, видзöны сöмын 8 мöс, 10 кукань да 3 вöв. Скöтлöн юрлыд воысь воö чинö. Лэччысьöны пемöсъясысь сы вöсна, мый некытчö инавны йöв, дона вына кöрым, уна сьöм мунö турун заптöм вылö.
* Сиктын 45 челядь, кодъяс велöдчöны Кужса, Озъягса да Кулöмдiнса школаясын. Кужса велöданiнын тöдöмлунъяс сетö 12 велöдысь. Школаын эм вöвлöм велöдчысь Сергей Тарабукинлы, кодi пöгибнитiс Афганистанын, сиöм пельöс.
* Садйын 28 челядь.
* Сиктсаясöс могмöдöны Кулöмдiнса сельполöн, «Барс» котырлöн да ас вылö уджалысь Л.В.Кузнецовалöн лавкаяс.
* Ветеранъяслöн котырöн уна во веськöдлö З.И.Юшкова. Олöмаяс зiльöны öтвылысь сиктса администрациякöд да социальнöй уджалыськöд. Ветеранъясöс позьö аддзывны и культура керкалöн сцена вылын. З.И.Юшкова да З.Н.Кузнецова петкöдчисны юркарын Кулöмдiнса землячествоö пырысьяскöд аддзысьлiгöн.
* Куж гöгöрса вöр-ва озыр тшак-вотöсöн, орчча Эжва ? чериöн. Татчö вотчыны да кыйны чери волöны весиг Кебанъёльса да Кулöмдiнса олысьяс.
* Сиктса администрациялöн зiльöмöн дзоньталыштiсны туйяс, югзьöдiсны уличаяс, öнi сюртчöны «Сöстöм ва» программаö. Ва провод нюжöдöм могысь районса администрациякöд öтув дасьтiсны бала. Кужсаяс сюртчылöны районса уна конкурсö да шедöдлöны приза местаяс.
* Культура керкаса уджалысьяс котыртлöны быдсямапöлöс гаж. Буретш танi ноябр 9 лунö мунiс «Райда» районса конкурс.
* Кужсаяс тöждысьöны вöр-ва видзöм вöсна. Найö эз миритчыны сыкöд, мый ас вылö уджалысьяс пöрöдiсны вöр дзик сикт дорсьыс. Шыöдчылiсны районса юралысь Д.А.Шатохин дорö, и вöр пöрöдöмысь дугдiсны.
* Сиктсаясöс ёна майшöдлö важ, дзескыд да кöдзыд бурдöдчанiн. Кöсйöны лэптыны выльöс, но делöыс водзö эз на вöрзьы

Комментарии:

Добавить комментарий

Свежий выпуск: за 26 марта