Кутас вöчны брикет 

[ A+ ] /[ A- ]

Сыктывкарса асшöр уджалысь Вячеслав Альбертович Панюковлöн Тимшерын эштанвыйын вöр колясъясысь брикет вöчанiн, кодöс восьтас тайö тöлысьын нин. Сувтiс 30 миллион шайт дон. Кольöм воын лöсьöдiс ангар. Оборудование Латвияысь, кытысь специалистъяс и сувтöдöны да лöсьöдöны сiйöс. 
Вячеслав Альбертович дорын уджалö районысь 40 морт. Босьтас содтöд дасöс, кодъясöс велöдасны Латвияса уджалысьяс. Брикет вöчанiн кутас уджавны кык сменаöн, суткиöн вöчны 22 тонна ломтас. 
— Посёлокса администрациялысь кöртымала пилорамакöд орччöн му юкöн, сэтчö чукöрмис вель уна пилипызь да гöрбыль. Сiйö тырмас вöчны ломтас куим во. Тимшерса да матiгöгöрса йöзöс могмöда пескöн, кута вузавны и выль ломтас. Сёрнитi нин «Шоныд сетан Коми компаниякöд», сыкöд лöсьöдам сёрнитчöм да кута могмöдны брикетöн. Ньöба машина да кутам новлыны асьным, — висьталiс Вячеслав Альбертович. 
Брикет кутас петны кык визьöд, мöвпалö лöсьöдны нöшта сы мындаöс жö. Пилипызь кутасны пыртлыны машинаöн, а сэсся лöсьöдасны да öти визьöд кутас локны посньöдлöм гöрбыль, а куимöд — пилорамасянь пилипызь. 
В.А.Панюков районын вöр заптö 2011 восянь. Эм пилорама. Кольöм воын вöчис 30 сюрс кубометр гöгрöс вöр. Иналö «Мондилы» да мукöд котыръяслы, 10 сюрс кубометр пиломатериал мунiс суйöр сайö. Тöвнас босьтiс посёлок сайысь 11 гектар вöр юкöн, кодöс и пöрöдöны öнi. Бокиысь локтысьяслы эмöсь оланiнъяс, пусянiн-нуръясянiн, пывсян. 
— Танi «Харвестер» вылын куим уджалысь да öти пусьысь, сiйö жö овмöс видзысь. Куим агрегат пöрöдчö, öти вöчö туй. Тöвнас миян дорын уджалiс 60 морт, öнi чинтысим 40-öдз. Сы вöсна мый «Мондилы» сетiсны вöрлысь бур юкöнъяс, а миянлы потш кодь том вöр, кодлы быдмыны да быдмыны. Став вöснисö, пу йывъяссö да увъяссö, кутам петкöдны брикет вöчанiнö. Ёна кутiсны дзескöдны вöр заптысь асшöр уджалысьясöс. Вячеслав Альбертович кутö 50 километр вöр туй. Кольöм воын дзоньталiс, кодйис пöлöныс, мед эз сулав ва. Öнi сы кузя июльсянь ветлöны «Мондилы» вöр заптысьяслöн машинаяс да пола, мый пасьвартасны, — висьталiс тöжд-могсö В.А.Панюков дорын уджалысь мастер Андрей Михайлович Паршуков, кодi вöр овмöсын 18 арöссянь, В.А.Панюков дорын 2011 восянь. 
Öнi асшöр уджалысь виччысьö аукцион нуöдöм, мед босьтны вöр юкöн. Уджалысьяс кутöны лача, мый торйöдасны öнiя серти бурджыкöс. 
Марина Дадашова. 
Гижысьлöн снимок вылын: 
В.А.Панюков; мастер А.М.Паршуков.  


Комментарии:

Добавить комментарий

Свежий выпуск: за 18 октября