— Талун сöветын дас депутат, — висьталiс Татьяна Витальевна. — Кызвыныс уна во дорвыв бöрйöмъяс, уджалан туйвизь налы бура тöдса. Водзмöстчысьöсь, йöз вöсна ыджыд тöждаöсь. Уджыс уна да куим тöлысьöн öтчыд пыдди чукöртчылам матö быд тöлысь. Устав да бюджет видлалöм да вынсьöдöм кындзи, уджалам йöзкöд.
Депутатъяс аддзысьлöны йöзкöд выльлунъясö. Найö локтöны быдсямапöлöс корöмöн, шуам, дзоньтавны оланiн, вöчны моски, лöсьöдны туйяс. Депутатъяс пыр дасьöсь отсавны, но, овлö, оз вермыны — абу сьöм. Та вöсна шыöдчöны «Кулöмдiн» овмöдчöминлöн администрацияöн веськöдлысьлысь могъяс олöмö пöртысь В.П.Игнатов либö райсöветса депутатъяс дорö.
Бур сiйö, мый таво унатор позяс вöчны «Йöзкостса бюджет» программа серти, вынсьöдiсны нин уна бала.
Овмöдчöминö Носимлöн да Паспомлöн пырöмкöд йитöдын депутатъяслöн да сиктса администрациялöн тöжд-могыс нöшта содiс. Сэнi олысьяс шыöдчылiсны нин уна корöмöн.
Татьяна Витальевна тöдчöдiс, мый йöзкöд бур йитöдын кутасны уджавны и водзö, збыльмöдны налысь корöмъяссö, вöчны унджык бур.
Гижöд да снимок
Галина НЕСТЕРОВАЛÖН.