Миян районын йöзöс дорйöм кузя госуслугаяс сетан шöрин, шöр бурдöдчанiнысь психолог да нöбасьысьяслöн жыр сюртчисны «Козьнав меным олöм!» шыöдчöмö.
Такöд йитöдын 45 арöсöдз нывбабаяскöд да 7-11 классъясса велöдчысьяскöд аддзысьлiсны Смолянкаса да Немдiнса школаясын, Югыдъягса культура керкаын. Öтув чукöрмылiс 80 морт. Висьталiсны öнiя олöмын семьялöн, торйöн кö, мамъяслöн ыджыд тöдчанлун йылысь, сы йылысь, мый кагаöс лöсьöдöм — зэв буртор, и, мöдарö, кынöмысь сiйöс вöтлöм — ыджыд лёктор.
Медводз юргис «Солнечный круг» сьыланкыв. Сэсся чукöртчöм йöзлы петкöдлiсны видеоролик, кöнi унапöлöс арлыда йöз донъялöны кынöмысь кагаöс вöтлöм. Сiдзжö петкöдлiсны «Русский крест» да «Мужской вопрос» фильмъяс да сёрнитiсны на йылысь. Быд аддзысьлiгöн волысьяс воисны öти кывйö, мый кага лöсьöдöм дiнö колö матыстчыны ыджыд кывкутöмöн, сьöкыдлунъяс дырйи шыöдчыны та йылысь бура тöдысь специалистъяс дiнö.
Социальнöй удж нуöдöм вöсна кывкутысь висьталiс сы йылысь, кутшöм отсöг вичмöдö семьялы да челядьлы отсасьысь юкöн. Психолог висьталiс сы йылысь, кыдзи петны сьöкыдлунъясысь, торйöн кö, шыöд-чыны эскöмлöн телефон пыр либö нöбасьысьяслы отсасян жырйö.
Бöрыннас ставлы вичмисны «Козьнав меным олöм!», «Социальнöй отсöг сетан юкöн челядьлы» да «Кык олан сям» гижöдъяс.
Татьяна Напалкова.
Снимок вылын:
Немдiнса школаын.