1973 воын Кулöмдiнын лоис воинскöй часьт. Тайö вöлi Печораса 200-öд радиотехническöй полклöн 8-öд торъя радиолокационнöй рота. Кулöмдiнын кындзи, тайö полклöн ротаяс вöлiны Зöвсьöртын, Улыс Омраын, Синдорын, Сосногорскын, Печораын, Усинскын, Интаын да Мыс Каменныйын (Ханты-Манси асшöр кытш). Роталöн «видзöдлас» улын вöлi сынöдлöн 400 километра пасьта матiгöгöрса юкöн — öтырышъя кывзысисны радиолокаторъясöн, оз-ö кодкö торк страналысь границаяс.
Гарнизонын öтпырйö служитiс 100 гöгöр морт, на пиысь квайт офицер да нёль прапорщик. Часьтын вöлi зенитнöй установка да сизим гранатомёт, но полигон эз вöв да велöдчöм могысь эз лыйсьывлыны, а ветлывлiсны тöвся да гожся полигонъяс вылö Челябинск обласьтса Чебаркуль карö. Кулöмдiнö салдатъяс воисны Свердловск обласьтса Первомайскöй посёлокын велöдчöм бöрын. Велöдчанiныс пырис сынöд доръян дасöд армиялöн кызьöд бригадаö. Служитлiсны и таджикъяс, и узбекъяс, и казахъяс, и эстонецъяс, и литовецъяс, но некор эз вöв зык-вен.
1986 воын часьтын вöчисны пыдö муö сюйöм команднöй пункт. Медводдза командирöн ротаын вöлi Фомин, сы бöрын В.Грибко, С.Родюшкин, Г.Печерский, В.Ващук, А.Седов.
1980-öд вояс шöрын странаын лоöм вежсьöмъяс инмисны и часьтлы. Салдатъясöс служитöмысь дугöдiсны. Часьтысь боеприпасъяс нуисны вертолётöн. 1993 вося сентябр 17 лунö колим ме да куим салдат. Часьтлöн овмöслысь колясъяс сöвтiм ЗИЛ машинаяс вылö. Ме ставсö бура томналi, та бöрын мöдöдчим Усинскö, кытчö колiс мунны служитны водзö. Кулöмдiнса роталöн тайö вöлi бöръя лун.
Иван КУЗНЕЦОВ.
Кулöмдiн.
Гижысьлöн гортса чукöртöмысь снимок вылын: 1989-öд вося февраль 23-öд лунö.