«Монди СЛПК» котыр вузалö вöчöмторсö суйöр сайö, та вöсна колö, медым нинöм эз торкав ни вöр пöрöдiгöн, ни нуигöн, эз зыксьы вужвойтыркöд. Такöд йитöдын комбинат кутчысьö FSC сертификацияöн урчитöмторъясö. «Монди» кöсйö босьтны кöртымö Озъягса лесничествоысь 31599 гектар вöр, кодi 20-25, 27-32, 36-40, 44-48, 52-57, 62-68 кварталъясын (видзöдöй карта вылысь).
Шыöдчам районса олысьяс дорö: тайö кварталъясын кö тi кыйсянныд, ёна чукöртанныд тшак-вотöс, сэнi кö эмöсь гежöда аддзылан быдмöгъяс да пемöсъяс, ёна пыдди пуктана казьтыланiнъяс, гуяс, вöрса ёльяс, корам быть юöртны та йылысь тайö вöр юкöн сертифицируйтöм кузя кывкутысь специалист Ольга Кирсановалы (телефон 8 912 968 02 13, электроннöй адрес 391668@gmail.com).
Колö пасйыны, мый «Монди СЛПК» вöрса кварталъяс кöртымö босьттöдз мöдöдö та йылысь юöр да карта-схемаяс районса администрацияö да сiйö овмöдчöминъясса администрацияясö, кöнi арталö уджавны. Танi ёна кывкутысьöн колö лоны сиктса юралысьяслы: юöртны олысьяслы, кöнi кöсйö пöрöдчыны комбинат, эскöдны йöзöс, мед пасъяласны, кытчö пырны оз позь. Вöр сетö ыджыд отсöг сиктса олысьялы, и мед эськö эз жö артмы, мый вотчысь ли кыйсьысь син водзö сувтiс эз тшем вöр, а паськыд кушин.