Дас во сайын, 2006 вося июнь 22 лунö, медводдзаысь коми да роч кывъяс вылын юргис Коми республикалöн гимн. Коми республикаса Государственнöй Сöветлöн коймöдысь чукöртчöм кöкъямысöд сессия вылын сiйöс сьылiс «Асъя кыа» ансамбль. Тöдса, мый Коми республикаса гимнлöн подулыс — В.А.Савинлöн «Варыш поз» сьыланкыв. Гимнлы кывъяс комиöн лöсьöдiс Владимир Тимин, а рочöн — Александра Шергина да Александр Суворов.
Матö 12 во гимн юргис кывъястöг. Коми республикаса гимн йылысь закон вынсьöдiсны 1994 вося июнь 6 лунö Коми республикаса Верховнöй Сöветлöн дас кыкöдысь чукöртчöм кызьöд сессия вылын. «Варыш поз» сьыланкыв подув вылын сiйöс лöсьöдiс композитор Михаил Герцман.
Таво июнь 12 лунö, Россиялöн лунö, Коми республикалöн гимн медводдзаысь юргис Москваын С.В.Рахманинов нима гаж петкöдланiнын, сiйöс ворсiс Россияса пыдди пуктана артист Юрий Ткаченколöн весь-кöдлöм улын «Симфония гимнов» гажын öтувъя оркестр.
Коми республикаса государственнöй гимн йылысь законлöн медводдза юкöнын гижöма, мый гимн лоö Коми республикалöн государствоса пасöн, кодöс веськöдöма, медым видзны национальнöй культуралысь аслыспöлöслун, уна национальносьта йöзлысь öтувъялун. Уна йöзлöн чукöртчылiгöн гимн ворсiгöн ставöн сувтöны, айловъяс пöрччöны шапкаяс. Гимн ворсiгöн кö кыпöдöны Коми республикалысь государствоса флаг, ставöн бергöдчöны сылань чужöмöн.
«Республика» газет, историялöн наукаясса кандидат Ирина Мои-сеевалöн уджъяс вылö мыджсьöмöн, гижлiс, кыдзи артмис гимн.
«1990-öд воясын, кор республикаын öддзис национальнöй асшöрлун кыпöдöм, медтöдчанаторйöн лоис гимн лöсьöдöм.
Гимн лöсьöдöм да бöрйöм кузя комиссияö воис 40 гöгöр бала. Куимöс на пиысь вöзйисны видзöдлыны Коми республикаса композиторъяслöн котырлы. Гимн лöсьöдöм йылысь мöвп чужис 1990-öд вояслöн панасын «Коми войтыр» öтмунöмö пырысьяслöн, кодъяс лыдын вöлiны и гижысьяс. Буретш найö и вöзйисны «Коми войтырлöн» гимнöн босьтны Виктор Савинлысь «Варыш поз» сьыланкыв, кодöс сiйö гижлiс 1923 воын да сиис енбиа туй вылö сувтысь ёртъясыслы. Регыд поэт лöсьöдiс аслас кывбур вылö шылад, и артмис зэв кыпыд сьыланкыв.
Выль гимнлöн балалы шылада аранжировка вöчис республикаса композиторъяслöн котырöн веськöдлысь Михаил Герцман.
1994 вося июнь 6 лунö Верховнöй Сöветлöн дас кыкöдысь чукöртчöм кызьöд сессия вылын депутатъяс вынсьöдiсны «Коми республика- са государственнöй гимн йылысь» закон, кöть эськö унаöн шуисны, мый гимн кывъястöг оз вермы лоны. И сöмын 2006 вося июнь 22 лунö вынсьöдiсны кывъяс да выль ногаджык шылад, кодöс дасьтiс Михаил Герцман. Сёрнитны кö кывъяс йылысь, то кык куплет шуисны кольны коми кыв вылын, а кыкöс вуджöдны роч вылö. 2005 вося майын торъя комиссия шуис медбурöн Владимир Тиминлысь удж, кодi лöсьöдыштiс коми юкöнсö, а роч вуджöдöмсö Александра Шергиналысь. Но гимн сьылiгöн öти строка ковмис вежны, сiйöс босьтiсны поэт Александр Суворовлöн кывбурысь. Та вöсна рочöн гижысьясыс кыкöн – А.Шергина да А.Суворов.

Коми республикалöн гимн
(Комиöн, В.Тиминлöн лöсьöдöмöн, кывъясыс В.Савинлöн, рочöн -А.Шергиналöн да А.Суворовлöн).

Ылын-ылын Войвылын
Джуджыд парма сулалö.
Парма шöрын варыш поз
Кыпыд горöн шыалö.
Лэбзьöй, повтöм варышъяс,
Вына бордъяс шеныштлöй,
Веськыд туйöд нуöдöй,
Коми мусö югдöдöй!

Север, наш родимый край,
Глубоки твои снега,
Холодны твои ветра,
Высока твоя тайга!
Нас несут через века
Соколиные крыла.
Коми край, твоя судьба
Благодатна и светла!
Коми республикаса национальнöй туйвизьлöн министерство.