Январ 8-öд лунö полициялöн дежуритан юкöнö шыöдис Кекурса лавкаысь вузасьысь да юöртiс, мый вузасянiнö пырис ружьеа морт да кöсйис лыйны. Но ань дзебсис джадж сайö да пуля веськалiс кöзöдö. Повтöм ань уськöдчис ыршасьысь вылö да кöсйис лöньöдны. Вермасигöн ружье лыйис мöдысь. Кор айлов босьтчис зарадитны ружьесö выльысь, ань йöткыштiс сiйöс ывла вылö да игналiс кöрт öдзöс. Повзьöдчысь гöгöрвоис, мый пырны оз вермы, да мунiс. Кор полицияса уджалысьяс юасисны йöзлысь, тыдовтчис, мый лавкаö локтöдз сiйö юис сиктсаяскöд да сэки нин ыршасис лыйны ружьеысь. Öтлаын пукалiгöн казьтылiсны 2015 вося июль, кор тайö айловыс код юрöн öзтылiс лавкасö, кöнi уджалiс сыкöд öтлаын олысь ань. Сэки асьсö лыддис мыжаöн. Но кор сiйöс вайисны лавка дорö, мед видзöдлыны, кыдзи лöсялö висьталöмыс, сiйö ачыс асьсö дойдалiс дзоля пуртöн, а бöрыннас мыждiс полицияса уджалысьясöс, кöть эськö найö и нуисны матысса бурдöдчанiнö, кöнi сувтöдiсны вир петöм. Сэки Кекурса айловöс мыждiсны лавка öзтöмысь öти во да квайт тöлысь кежлö условнöя. Тайö сёрни бöрын айлов ветлiс гортас ружьела да патронъясла. Кор бергöдчис, кöсйис лыйны пызан сайын пукалысьяс пöвстысь öти тöдсаöс. Лыйис кыкысь. Кор босьтчис зарадитны выльысь, ружьесö мырддисны. Вöлöмкö, сiйöс лицензионно-разрешительнöй удж нуöдан котырын абу пасйöма. Гортсьыс нöшта аддзисны 4 порок пачка, 20 патрон да дрöб-порок дасьтантор.
Ружьеöн повзьöдчысьöс мортöс вины босьтчылöмысь йöршитiсны. Öнi туясьöны.
Пытшкöсса делöяс кузя
министерстволöн районса юкöн.