— Школа помалöм бöрын пыри велöдчыны Сыктывкарса университетлöн геология факультет вылö да армияö нуöмысь кольöдлiсны. Но танi велöдчöм эз во сьöлöм вылö да шыбитi. Мöд вонас пыри Коми пединститутлöн физкультура да ОБЖ кузя факультет вылö, сы вöсна мый спорткöд ёртаси ичöтсянь. Декабрын босьтiсны армияö. Княжпогостсянь нуисны Ковров карö. Сэнi видзöдлiсны документъяс да вуджöдiсны Москва обласьтса Коломнаö, кöнi велöдiсны компьютер отсöгöн веськöдлыны лётчикъястöг лэбалысь самолётъясöн, — висьталiс зон.
Часьтö локтiсны спецназлöн Тольяттиса медшöр управлениеысь офицеръяс да бöрйисны медся бур 10 салдатöс, на лыдын и Денисöс. Котырныс петавлiс карö лоöмторъяс вылö, корсис йöзöс. Лэбалысь дзоляник самолёт снимайтiс да компьютер пыр позис ставсö видзöдны. 2012 вося августын кöкъямыс морта котырöс ыстылiсны Дагестанса Буйнакскö. Олiсны гöраяс костын увтасiнын. Быд вежонö самолётъяс отсöгöн корсисны-кыйисны моджахедъясöс.
Öтчыд палаткаын пажун виччысигöн кылiс лыйöм шы. Рация пыр юöртiсны, мый уськöдчисны моджахедъяс. Ставныс сюся пасьталiсны бронежилетъяс, босьтiсны автоматъяс. Александр лэдзис сынöдö самолёт. Вöлöмкö, ыжъясöс видзысь ружьеысь лыйлiс койотъясöс, кодъяс усьласисны да сёйисны ыжъясöс. Дагестанö ветлöмысь Денислы сетiсны торъя тышъясын вöвлöмлысь ним.
2012 вося декабрын локтiс армияысь да кольöм воын помалiс велöдчöм. Школаын физкультура велöдысьлöн удж эз сюр да шыöдчис пытшкöсса делöяслöн районса юкöнö. Öнi тöдмасьö ГИБДД-са юкöнын инспекторъяслöн уджöн. Донъяласны да ыстасны министерстволöн велöдан шöринö.
Гижöд да снимок Марина ДАДАШОВАЛÖН.