Пыдди пуктана лыддьысьысьяс! Таво октябр 29-öд лунö ми кыпыда пасъям тöдчана лыдпас — комсомоллы 100 во тырöм. Важöн нин абу страна, кöнi коркö вöлi тайö котырыс. 27 во сайын комсомоллöн 1991-öд вося сентябр 27-29-öд лунъясö мунысь бöръя съезд юöртiс, мый котыр сэсся оз ло. 
«Парма гор» газет ёнджык лыддьöны шöр арлыда да олöма йöз, буретш найö, кодъяс вöлiны комсомолын, и налöн зiль уджöн, водзмöстчöмöн сэтшöм ёнöн да дзоридзалысьöн вöлi страна. Найö, кодъяс некор эз букшасьны мукöд национальносьта йöз вылö, и ёртъясöн да вокъясöн вöлiны белорус, украинец, молдаванин кöть грузин. Найö, кодъяс тöдчанаджыкöн лыддисны удж да зiлисны кадöн артасьтöг, тыртiсны да вевтыртiсны план. Кодкö шуас, аддзöмаöсь пö мыйöн ошйысьны — помся удж понда эз аддзывлыны челядьсö, семьясö. Но, видзöдöмпырысь, комсомолечьяслöн артмылiс ставыс: и уджыс мунiс, и челядьныс быдмисны шань йöзöн. 
Дона лыддьысьысьяс! Корам юксьыны асланыд казьтылöмъясöн, мый тiянлы бурсö сетiс комсомол. Уськöдлöй тöд вылад ассьыныд томлун. Тiянлысь гижöдъяс йöзöдам газетлöн лист бокъясын. Зэв бур, лоасны кö фотографияяс (ми найöс мöдöдам тiянлы бöр). 
А талунъя лист бокын йöзöдам гижöдъяс, кодъяс петлiсны «Ленин туйöд» газетын кольöм нэмын. Кодкö, гашкö, гижöдъясысь лыддяс ас йывсьыс либö аддзас тöдса ним-ов. 
Редакция.