Туйдысьнас да велöдысьнас вöлi ыджыд сяма Алексей Александрович Панюков. Öтлаын уджалысьяскöд волiс районлöн быд пельöсö. Кытчö кö да воöдчöны машинаöн, кытчö кö да лым вывтi ветлан техникаöн, кöнкö и пыжöн. Йöзлы да котырлы сюйöны телефон, йитöны интернет, лöсьöдöны интернет-телевидение. Дзоньталöны орöминъяс-жугласьöминъяс. Öтувъя государственнöй экзаменъяс да бöрйысьöмъяс водзын кытшовтöны, мед жыръясын бура уджалiсны видеокамераяс. 
Том морт связистъяслысь удж тöдiс дзолясянь. Лариса Николаевна мамыс 26 во вöлi телеграфисткаöн. Сэки интернет да сотöвöй йитöд эз вöвны да аньлы телеграммаяс вайлiсны чукöръясöн. Найöс колiс зэв öдйö печатайтны да ыстыны телеграфöн. Сiйö жö примитлiс аппарат пыр воöм телеграммаяс. Вöлiны чолöмалöмъяс, быдсикас, весиг гуся, юöръяс. 36 во связьын жö уджалiс ыджыд батьыслöн Лидия Николаевна чойыс. Вöлi телефонисткаöн. Йитлiс районсянь мукöд кар-районкöд сёрнитысьясöс. 
— Мамöй тшöкыда казьтывлö уджалан кадсö. Висьталiс, мый водзтi вöлi зэв уна уджалысь, матö быд сикт-посёлокын телефон станциялöн сёрнитанiн. Но олöм мунö, ставыс сöвмö. Сöвмö и связь, — сёрнитiс И.В.Липин. 
Гижöд да снимок Марина ДАДАШОВАЛÖН.