Ичöт футболлöн тöждъяс 

[ A+ ] /[ A- ]

Видзöдам футбол кузя мирса чемпионат, кодi мунö Россияын. Быд странаысь котыръяс дасьтысьöмаöсь ыджыд кывкутöмöн, ворсöны зэв бура. А кыдзи мунö футбол кузя удж миян районын? 
Тöдмалi, мый футболöн ворсысь котыръяс районын эмöсь матö 20 во. Ичöт футболысь велöдöны ворсны челядьöс Вочын, Зимстанын, Тимшерын, Кебанъёльын, Кулöмдiнын да Югыдъягын. Ворсöны 400 гöгöр челядь. Нуöдлöны районса ордйысьöмъяс. Медбура ворсöны Кебанъёль да Кулöмдiн, но и мукöд сиктъясын эмöсь нин ён котыръяс. 
Сёрнитi спортшколаса старшöй велöдысь Алексей Гришинкöд, сiйö висьталiс: 
— Республикаса ордйысьöмъясын ыджыд вермöмъяс миян абуöсь. Сьöм сетöны этша да этша и ветлöдлам, кöть сэнi уна ён котыр. Гежöдика ветлывлам Сосногорскö, Ухтаö, Воркутаö, Сыктывкарö. Чукöрмылö 10 котырысь оз этшаджык. Вермысьяс лыдö эг на петавлöй, но эска, мый лоам бурджыкöсь. 
Спорт школаö локтöмъяс пиысь кольöны сöмын найö, кодъяс сьöлöмсянь радейтöны футбол. Алексей Владимирович ёна уджалö бать-мамкöд, висьталö быдтасъясныслöн позянлунъяс йылысь да öтув быдтöны бур ворсысьясöс. 
Öнi, кор мунö футбол кузя мирса чемпионат, быд чукöртчылiгöн сёрнитöны, кодi бурджыка ворсö, кодi сюйис мач, кыдзи донъялöны судьяяс. Зонъяслöн эмöсь радейтана футболистъяс. Ёна юасьöны тренерлысь, мый йылысь сiйö мöвпалö, кодi эськö вермас, да с.в. 
Зэв тöдчанаöн таво вöлi республикаысь ичöт футболöн ворсысь «Новая генерация» котырлöн волöм. Вöлiны медбур ворсысьяс да велöдыштiсны, кыдзи ворсны бурджыка. Челядьлы тайö лоис зэв ыджыдторйöн, ышöдiс ворсны тöдчымöн бурджыка, дасьтысьны кывкутöмöнджык. 
Алексей Владимировичöс ёна майшöдлö, мый миян абу ни öти ичöт футболöн ворсанiн. Во чöжöн ордйысьлöны сöмын öтчыд. Кор мунöны республикаса тшупöд вылö, абу тырвыйö дасьöсь. Позьö вöчны ас вынъясöн, но колö отсöг, мед веськöдны да шыльöдны мусö. Падмöдö сiйö, мый посни классъясын велöдчöны мöд сменаö. 
— Аттьö районса администрацияöн веськöдлысь С.В.Рубанлы — районын футбол кузя федерацияса президентлы. Гöгöрвоö спортлысь тöждлунъяс, «висьö», мед сöвмис футбол. Быд во мунö районса юралысьлöн кубок вылö вермасьöм. Волöны котыръяс оз сöмын районысь, но и Сыктывкарысь, — висьталiс А.Гришин. 
Алексей Владимирович бура гöгöрвоö, мый сöмын челядьöс бура дасьтöмöн позьö ловзьöдны районын и верстьöлысь ворсöм, кодi кутiс кусны дзикöдз. Танi районса администрациялöн веськöдлысьлöн отсöгыс, дерт, зэв кивыв, но мед эськö сюртчисны и уджалысь котыръясöн веськöдлысьяс. 
Галина Клюжевалöн снимок вылын: А.В.Гришин аслас быдтасъяскöд.
 

Комментарии:

Добавить комментарий

Свежий выпуск: за 15 ноября