«Луд». Любовь ТИМУШЕВА (Смолянка, 4 класс).

1942-öд вося фотография вылын Öкöс грезд да Воч сиктса айловъяс, кодъяс мöдöдчöны фронт вылö.
Снимок Валентина Замятиналöн архивысь (Тюмень).

Май 31 лунö районö волiсны республикаысь Государственнöй Сöветса юралысьöс вежысь, Госсöветса депутат В.А.Косов, Госсöветысь общественносьткöд да юöр сетысьяскöд йитöдъяс кутан юкöнса начальникöс вежысь С.И.Михайлов. Аддзысьлыны Кебанъёльса да Донса олысьяскöд. Кебанъёльсаяс шыöдчылiсны лöп-ёг да шыблас чукöртанiн посёлокысь ылöджык кыпöдöм, а донсаяс школанысö начальнöйö вуджöдöм кузя асланыс вöзйöмъясöн.
Кебанъёльын чукöртчылiгöн карсаясысь кындзи вöлiны райадминистрацияöн веськöдлысьöс вежысь Н.А.Чаланова, вужвыйöн стрöитчöм да муöн вöдитчöм кузя управлениеса начальниклысь могъяс олöмö пöртысь В.П.Игнатов, овмöдчöминса депутатъяс М.Х.Савицкий да А.М.Усов, овмöдчöминса юралысь А.Ю.Прокушев, «Юрган» телеканалса уджалысьяс. Сёрни пансигкежлö йöз вöлi этша, сы вöсна мый посёлоксаяслы чукöртчылöм йылысь эз юöртны, чукöртчисны асывнас, кор ставöн удж вылынöсь. Но вочасöн векжö чукöрмисны ичöтик жыр тыр.
В.А.Косов сёрнитiс:
— Быдлаын туплясьö ёг, туй бокъяс да сы дорса вöръяс тырöмаöсь шыбласöн. Ёг чукöръяс содöны лунысь-лун, воысь-во. Медым татшöмыс эз ло, колö найöс чукöртны öтилаö да нуны-инавны. Та могысь и шуöма кыпöдны Кебанъёльса полигон. Могыс сьöкыд, сiйöс олöмö пöртöм босьтас уна кад, вын да зэв уна сьöм. Сёрни мунö уна дас миллион шайт йылысь. Сöмын документъяс лöсьöдöм вылö мунiс матö 3 миллион шайт.
Кебанъёльсаяс гöгöрвоöны депутатöс, но найö сулалöны сы вылын, медым полигонсö кыпöдны посёлоксянь оз 2,5, а 15-20 километр сайын. Полигон лэптанiнын визувтö кык шор. Öтиыс усьö Сордъёльö, кытысь ва трубаясöд локтö гортöдз, мöдыс — Эжваö. В.А.Косов гöгöрвоöдiс, мый полигон лэптанiнсö помсянь помöдз эжасны резинаысь ён материалöн, кодi оз лэдз веськавны муö некутшöм лёкторлы, да нöшта тöдчöдiс, мый ёгсö кутасны видзны торъя мешöкъясын. Сiйöс торйöдласны, топöдасны-нырасны, изасны да нуасны, а оз видзны век. Полигонсö гöгöртасны джуджыд потшöсöн, сiйö пыр лоö дöзьöр улын, сетас удж 17 мортлы.
Но посёлоксаяс эз эскыны. Миян странаын пö нинöм тыр-бурасö оз вöчны, кутшöмкö кад мысти Кебанъёль лоас карбердса мöд Эжваöн, кöнi лёк дук йиджöма сынöдас. Вöзйисны кыпöдны заводсö весиг Крутоборкаö. В.А.Косов вочавидзис, мый Кебанъёль сайса кыпöданiнсö урчитöма нин документъясын, видзöма зэв уна сьöм, вöчöма экспертиза да öдвакö артмас кыпöдны мöдлаö. Госсöветса депутат дор сувтiсны овмöдчöминса депутатъяс М.Х.Савицкий да В.В.Воробьёв. Найö пасйисны полигон-лысь ыджыд тöдчанлунсö, бур вайöмсö. Но кебанъёльсаяс чорыда сулалiсны асланыс видзöдлас вылын. М.Х.Савицкий вöзйис лöсьöдны полигон кыпöдöм бöрся видзöдысь комиссия, кытчö пырасны кебанъёльсаясöн бöрйöм йöз. В.А. Косовлы воис сьöлöм вылас вöзйöмыс да, тайö кö вежас посёлоксаяслысь видзöдлассö, шуис лöсьöдны комиссиясö.
Чукöртчысьяс разöдчисны öти кывйö вотöг. В.А.Косов шуис, мый Госсöветлöн матысса чукöртчылiгöн сiйö висьталас посёлоксаяслысь полигон ылöджык кыпöдöм йылысь корöмсö. Лоас кö кöть неыджыд позянлун пöртны олöмö налысь корöмсö, сiйö вöчас став верманасö. Но эскисны-ö кебанъёльсаяс депутатлöн кывъяслы? Öдвакö.
Сiйö жö луннас В.А.Косов да С.И.Михайлов котыртлiсны Донса öнiя школаöс начальнöйö вуджöдöм йылысь сёрни. Районысь велöдан управлениеса начальник О.В.Лебедева висьталiс, мый Донса школаын тöдöмлунъяс босьтö 50 велöдчысь. Классъясын челядь этшаöсь, а велöдысьяс удждон босьтöны сэтшöмöс, кутшöмöс и гырысь классъяс велöдысьяс. Донсянь Кулöмдiнöдз туй абу лёк, босьтö оз уна кад, автобусöн Кулöмдiнса школаö новлöдлöмöн не-кутшöм падмöг абу. Тöдчöдiс, мый ыджыд, быдторйöн могмöдöм школаын челядь босьтасны бур тöдöмлунъяс. Вöлi сёрни школаса директор О.В.Пунеговакöд, медым Донысь вуджöм челядь вöлiны бур видзöдлас улын, торйöн нин медводдза куим тöлысьсö. Тайö колö, медым челядьлöн выльлаö велалöм мунiс кокниа да эз тöдчы лёк боксянь велöдчöм вылö. Накöд пыр кутас уджавны психолог. Сёрни бöрын В.А.Косов кывкöртiс, мый велöдысьяслысь да велöдчысьяслысь правояссö абу торкöма. А школасö начальнöйö вуджöдöмысь видзтöм сьöм мунас сiйöс дзоньталöм вылö.
Алексей КОРЕЦКИЙ.
Читать далее →

Нэм джынйысь дырджык уджалöм бöрын тупкысьö Кулöмдiнса нянь пöжалан завод. Такöд йитöдын юалöмъяс вылö вочавидзис районса администрацияöн веськöдлысь Сергей Владимирович РУБАН.
— Кыдзи донъяланныд тайö предприятиесö районлы коланлун боксянь?
— Тöдвылö кö уськöдны кольöм кадсö, Кулöмдiнса нянь пöжалан завод вöлi уджалысь ыджыд котырöн, могмöдiс эз сöмын няньöн да пöжасъясöн, но и лэдзис алкогольтöм юанторъяс, юмовторъяс да мукöдтор, мый разалiс район пасьта. Вель дыр на кутчысис зумыда райпотребсоюзлöн бырöм бöрын, кодлöн котырын сiйö вöлi да могмöдiс сьöмöн да уджалöм могысь мукöд колантор-йöн. Но сы бöрын, кор воссялiсны нянь пöжаланiнъяс Озъягын, Кебанъёльын, Зимстанын да мукöдлаын, лоисны сьöкыдлунъяс, а сэсся сьöктöдiс дзикöдз. Пöжасянiн вочасöн чинтiс лэдзанторъяслысь лыд, нинöм эз кут вöзйыны ньöбасьысьяслы выльсö. Медшöр уджöн лоис вузасьöм. Сэсся пасьмунiс шоныд сетанiнын пöрт, кодi тöдчис жö уджаланног вылö.
— И районса администрация водзмöстчис тайö котырсö бырöдöм йылысь май 31 лунö индöд кырымалöмöн…
— Тайöс вöчны вöлi зэв сьöкыд, ми дыр корсим петан туйяс, медым тайö котырыс уджалiс водзö. Но уджйöзыс сiйöс могмöдысьяс водзын содiс. Нянь пöжаланiнöн веськöдлысьяслы ковмис тупкыны лавкасö Аэропортысь, кöть ньöбасьысьыс сэнi вöлi тырмымöн. Нянь пöжалысьяскöд аддзысьлiгъясöн ми корим, медым вöзйисны водзö уджалöм могысь ассьыныс мöвпъяс, но лöсяланасö эг кылöй. А талун кежлö уджйöзыс могмöдысьяс водзын матö 3 миллион шайт. Кöть и корсям та мында сьöмсö да тупкам уджйöзсö, серпасыс оз вежсьы, а лоас таысь на лёкджык, сы вöсна мый сентябрын лоисны эськö алкогольöн вузасьöм могысь программа лöсьöдöм вылö содтöд тöдчана рöскодъяс. Предприятиелöн уджйöзыс татшöм ногöн усяс районлöн бюджет вылö, кыдзи тайö вöлi эз на сэтшöм важöн муниципалитетлöн оланiнъяс кузя служба котыркöд. Татшöм кывкöртöдас воим нöшта сы вöсна, мый ачыс предприятие этша вöчис серпассö бурмöдöм могысь, а могмöдны сiйöс сьöмöн районса бюджетысь — тайö лöсявтöмтор. Районса администрация вермас отсавны, медым кутчысис производство, а эз вузасьöм, тшöтш и алкоголя юанторъяс вузалöм. Тайö подув вылын кутчысьö и республикаса да федерацияса бюджетысь сьöмöн отсалöм. Но танi бöръя кадö суткиöн пöжалiсны сöмын 200 тупöсь. Озъягын пöжалöны унджык. Гöгöрвотöмöсь татчöс веськöдлысьяслöн кутшöмсюрö воськовъяс, пример вылö, ЗИЛ автомашина ньöбöм, кодi видзö уна ломтас да тöваръяс ваялöмысь вайö сöмын воштöмъяс.
— Мый позьö лöсьöдны нянь пöжаланiн пыдди?
— Аски (С.В.Рубанкöд сёрнитiм июнь 1 лунö — В.Л.) районö локтö республикаысь видз-му овмöсса министрöс вежысь да та йылысь сёрнитам медводз сыкöд. Бур эськö вöлi, кодкö кö босьтiс ас районсаяс пöвстысь, а эз бокысь да котыртiс производство, могмöдiс уджöн йöзöс. И, колö шуны, мый районысь асшöр уджалысьяс пöвстысь кодсюрö юасьлiс нин. Аукцион петкöдлас, кодлöн киö сiйö веськалас. Юöртам предприятие бырöдöм йывсьыс да позьö индыны управляющöйöс. Эм сёрнитчöм В.В.Вокуевкöд. Сiйö кутас вузавлыны эмбур да вештыны предприятиелысь уджйöзсö, а сiдзжö уджа-лысьяслы пособиеяс. А мый вылö оз тырмы, ковмас корсьны районлöн бюджетысь. Ме нöш-та öтчыдысь тöдчöда, мый нянь пöжаланiнсö тупкöмöн нюжöдчыны оз позь, лоасны нöшта ыджыд воштöмъяс.
— Уна-ö йöз кольöны уджтöг?
— Комын куимöн, на лыдын дасöн пенсионеръ-яс. Матыстчылiсны нин йöз Сыктывкарысь и ас районысь, кодъяс дасьöсь босьтны нянь пöжаланiн-лысь лавкаяс, и ме шыöдчи на дорö, мед найö колисны асланыс уджаланiнъясын вузасьысьясöс. Налы, кодъяслы удж оз ло, закон серти во джын вештасны шöркодь удждон. Сэсся позяс шыöдчыны уджöн могмöдан районса шöринö. Эм кö уджыс, сетасны, а абу кö, то вöзъясны велöдчыны. Миян медся ыджыдöсь позянлунъяс котыртны асшöр удж видз-му овмöсын. Кутам уджавны асшöр уджалысьяскöд, медым найö босьтiсны нянь пöжаланiнысь йöзöс асланыс котыръясö.
— Збыльысь эз вöвны асланыс уджалысьяслöн мöвпъяс, медым предприятиеыс эз тупкысь?
— В.В.Вокуевлöн вöлi мöвп котыртны печенньö вöчöм, мый вылö колö содтöд сьöм, а сiйö бюджетын абу. Талун эм вель уна программа отсавны ичöт да шöр бизнеслы видз-му овмöс министерство пыр, вештöны кутшöмсюрö рöскодъяс и нянь пöжаланiнъяслы, но сы вöсна, мый Кулöмдiнса нянь пöжаланiн унитарнöй предприятие, тайö программаас оз веськав. Уна котыръяслы, кодъяс босьтöны нянь да пöжасъяс федерациялöн 44-öд закон серти, быть лоö кутны йитöд ичöт бизнес юкöнын уджалысьяскöд да муниципалитетлöн нянь пöжаланiн, кодi лоö унитарнöй предприятиеöн, тайö аукционъясын петкöдчыны оз вермыны.
— А позис-ö мыйкö вöчны, мед нянь пöжаланiн уджалiс водзö?
— Тайöс колiс вöчны некымын во сайын. Медводз-кö, мынтöдчыны ыджыд рöскодысь, кодi мунiс шоныд сетанiн кутöм вылö. Та вылö да ломтысьысьяслы удждон вылö во чöжöн мунiс матö кык миллион шайт. Позис йитчыны «Коми тепловая компаниялöн» шоныд сетанiнкöд либö сувтöдны донтöмджык ломтасöн шонтысь пöрт. Колiс чинтыны уджалысьяслысь лыд. Сöмын тадзи. 2006 воын Кулöмдiнса сельпоöн веськöдлысь З.Г.Сухолуцкая шыöдчылiс ньöбны пред-приятиесö, но районöн веськöдлысьяс та вылö эз мунны, а öнi экономи-каын сьöкыдлунъяс вöс-на Зоя Григорьевналöн татшöм позянлуныс абу.
— Сергей Владимирович, а паськöдчыны кö видз-му овмöс рынокöн?
— Рынок улö местаыс тырмымöн. Унджык оз ков.
— Мый нöшта вöзйылiс районса администрация нянь пöжаланiнлы?
— Ми вöзйылiм лавка пыдди восьтны кафетерий, лэдзны сылы лöсяланаторъяс, но ставыс тайö сувтö дона. Сöмын öтипöлöс пирожнöй лэдзöм могысь колö лицензия, кодi сулалö 15-сянь 50 сюрс шайтöдз. Кыдз шулöны, «вуджны выль рельсъяс вылö» колiс ёна водзынджык, кор кутiс тыдавны, мый нянь оз кут инасьны, босьтчисны ньöбны мукöдъяслысь.
— Босьтны кö тöдвылö сiйöс, мый колö районлы, то мый позьö сэнi вöчны?
— Тi, став сертиыс, тöданныд, мый асшöр уджалысь С.А.Тимушев кыпöдö Кулöмдiнын начкысянiн. Сiйö видлалö позянлун восьтны яйысь вöлöга вöчанiн. Эмöсь и мукöд вöзйöмъяс. Ставсö видлалам, но кывкöртöдсö вöчас аукцион. Дерт, ми бокын ог сулалöй, кутам уджавны сы вылын, медым воссис сэтшöм производство, кодi колö районлы да кодi эськö могмöдiс уджöн районса йöзöс.
— Кулöмдiнса нянь пöжаланiн оз ло. Тöдчас-ö тайö йöзöс могмöдöм вылö?
— Оз. Сы вöсна мый прöдукциясö лэдзисны зэв нин этша. Няньöн да пöжасъясöн тырвыйö могмöдасны мукöд нянь пöжаланiнъяс, падмöгъяс оз лоны.
Василий ЛОДЫГИН.
Читать далее →

Пыдди пуктана лыддьысьысьяс!
Водзö мунö 2016 волöн мöд джын кежлö «Парма гор» газет вылö гижöдчöм.
Таво редакция нуöдас гижöдчысьяс костын пудъясьöм. Июльлöн медводдза лунъясö «Парма гор» газеткöд тшöтш тiянлы воас газетлöн печатя неыджыд кабалатор, кöнi лоас пасйöма номер.
Тайö номеръяс серти июль 15 лунöдз пудъялам козинъяс: электрическöй чайник, утюг да миксер.
(Козин сетiс «Элис» вузасянiн).
Тэрмасьöй гижöдчыны
«Парма гор» вылö!
Гижöдöм помасьö июнь 25 лунö.
Снимок вылын: кодлыкö мойвиас, и пöсь чай кутас юны тайö выль чайникысь.
Читать далее →