Войнаöдзса кадö бергöдчылiсны ветеранъяслöн районса котыръяс, кодъяс сьылöм-йöктöмöн, ворсöмöн петкöдлiсны зiля уджалöм, гажöдчöм, зонъясöс вöрöгкöд тыш вылö колльöдöм. Буретш войнаöдзса кадлы вöлi сиöма фестиваль, кодi мунiс ноябр 16 лунö районса культура керкаын. Сьöрсьöн-бöрсьöн сцена вылö петiс 14 котыр. Медводдзаысь на ыджыд сцена вылын Ярашъюысь «Йöлöга» да Немдiнысь «Немдiнса сьöлöмшöръяс» котыръяс. Ветеранъясöс эз повзьöдны шогмытöм туйяс. Волiсны Пузлаысь и Пожöгысь, Ручысь и Аныбысь. Ставнысö пасйисны дипломъясöн да козинъясöн. Медся вылö донъялiсны Ручысь «Сударушка» котырöс, кодöн веськöдлö Надежда Михайловна Подюкова, баян вылын ворсö Аныбысь Иван Васильевич Нестеров. Олöмаяс сьылöны да йöктöны, петкöдчöны быдсяма ворсöмъясын, гажöдöны районсаясöс.
Фестиваль вылын мöдöн лоис Помöсдiнысь «Сьöлöм сьылöм» да коймöдöн Аныбысь «Пöлöзнича» котыръяс.
Котыръяс сiдзжö петкöдчисны коми сёян-юан дасьтöмöн да сiйöс гöсьтъяслы вöзйöмöн. Киподтуйыс тыдалiс быдсяма кыöмторйын, пуысь да сюмöдысь вöчöмторйын да с.в. Танi медбурöн лоис Дереваннöйса «Пармаса шыяс» котыр.

Гижöд да снимок

Марина Дадашовалöн.