«Эзысь нылыс» — Агния Игнатова

[ A+ ] /[ A- ]

Март 23 лунö Помöсдiнса культура керкаын бöрйисны «Эзысь нылöс». Ордйысисны 8 классысь Алёна Бизина, 9 класысь Елизавета Шомысова да Диана Попова, 10 классысь Агния Игнатова, Анастасия Дёмина да Арина Игнатова.
Найö босьтчисны ордйысьны öтув йöктöм бöрын. 

Висьталiсны ас йывсьыныс, тöдмöдiсны коми йöзлöн важ оласногöн, петкöдлiсны важ кöлуй, разисны да бöр чукöртiсны яй шырантор, дöмсисны, вочавидзисны юалöмъяс вылö да петкöдлiсны сям.
Нывъяс висьталiсны.
Алёна Бизина:
— Ме радейта ворсны гитараöн да гижа кывбуръяс. Ог радейт математика, пола мöсъясысь да чераньясысь, водз чечча сьöкыда. Сьöлöм вылö воöны спорт да коми литература.
Анастасия Дёмина:
— 9 классöдз велöдчи Ярашъюса школаын. Сэсся вуджи Помöсдiнö. Радейта исласьны лыжиöн да сьывны.
Елизавета Шомысова:
— Ме йöкта, ворса волейболысь, велöдча кыны юрси, ёна дасьтыся экзамен кежлö. Дзолядырйи и öнi радейта мичаа пасьтасьны. Сьöлöм вылö воö гора шылад кывзöм, öдйö лэбзьö лёк ру. Таво ва вежöдан лунö суныштлi ваö, лоис зэв лöсьыд.
Арина Игнатова:
— Велöдча 10 классын, велöда корейскöй да французкöй кыв. Радейта биология да роч кыв. Кöсъя лоны бурдöдысьöн.
Диана Попова:
— Сьыла-ворса гитараöн, ветлöдла лыйсьыны.
Агния Игнатова:
— Пукта ас водзын мог да зiля пöртны сiйöс олöмö. Ветлöдла ворсöмъяс пуктысь «Дебют» котырö, серпасася. Велöдча физико-математическöй лицейын. Пыдди пукта бать-мамöс да чужан кыв.
Нывъяслöн дасьтысигкостi гажöдiсны «Акустические ребята» сьылан, «Вдохновение» да «Танцевальная планета» йöктан котыръяс, петкöдлiсны мича юрсияс найöс кыны велöдчысьяс.
«Мича ныв» ордйысьöмын нывъяс петкöдлiсны коми йöзлысь важ оласног. Висьталiсны Купальнича да Иван лунъяс йылысь, петкöдлiсны верöс сайö петöм водзвылын бöрдöдчöм, Тима Веньлöн «Ныв сетöм» гижöд серти корасьöм.
Яй шырантор медöдйö тэчис да разис Диана Попова. Сылы тырмис 19 секунда.
Нывъяс вурисны дöмас. Зэв сьöлöмсянь, мед артмис мичаа. Та бöрын вочавидзисны юалöмъяс вылö. Медбура вочавидзис Агния.
Сям петкöдлiгöн Диана сьылiс гитара улö, Анастасия мамыскöд. Агния петкöдчис ворсанторйын. Алёна сьöлöмсяньыс висьталiс ассьыс кывбур. Арина нывъёртыскöд сьылiс корейскöй кыв вылын. Елизавета нывъёртыскöд кыпыда йöктiс.
Кывкöртöд вöчигöн велöдан управлениеса начальник О.В.Лебедева шуис:
— Окота пасйыны ставнысö, быдöн петкöдчис бура. Ёна воис сьöлöм вылö нюмъялысь Елизавета. Диана тэрыба тэчис яй шыран. Алёна мичаа висьталiс кывбур. Арина чуймöдiс корейскöй кыв велöдöмöн. Агния бура вочавидзис коми йöзлöн важ оласног йылысь юалöмъяс вылö. Анастасия сьылiс мамыскöд. Но вермас сöмын öти.
Аттьöалан гижöдъяс вичмисны Арина Игнатовалы, Анастасия Дёминалы, Алёна Бизиналы, Диана Поповалы, Елизавета Шомысовалы, гажöдысь котыръяслы, а юркытш вичмис Агния Игнатовалы, кодi лоис «Эзысь нылöн». Сiйö зэв варов да сибыд. Бура велöдчö, радейтö волейбол. Дасьтысис ёна, лыддис весиг «Коми йöзкостса искусство» книга. Отсалiс коми кыв велöдысь Т.В.Уляшева.
Агния висьталiс:
— Медся ёна сьöлöм вылö воис öтув йöктöм. Медся сьöкыда сетчис яй шыран тэчöм. Öдйöджык разьны да тэчны автомат.
Мöдöд во нин петкöдчисны Диана да Елизавета.
— Ме кыкнанысьсö лои мöдöн. Тайö ордйысьöмас петкöдчöмöн кыпалö лолыд. Нимкодь, мый петкöдчи, но колiс дасьтысьны бурджыка, — висьталiс Елизавета.
— Öнi йöз оз нин вöдитчыны, шуам, сера паличöн, печканöн, швейкаöн да с.в. Та вылö видзöдтöг, быд мортлы колö найöс тöдны, öд тайö миян важся оласног. А важсö тöдтöг, кыдз шуöны, водзö мунöмыс оз ло, — тöдчöдiс «Эзысь ныв» ним шедöдысь Агния Игнатова.
«Патриот» керкаöн веськöдлысь А.А.Глуханич вöзйис эз сöмын нывъяслысь «Эзысь ныв», но и зонъяслысь «Удал зон» ордйысьöм. Тайö зэв ыджыд буртор. Челядь лоöны збойджыкöсь, кутасны зiльны сöвмыны водзö, тöдны йöзлысь важ оласног.
Галина КЛЮЖЕВА.
Гижысьлöн снимокъяс вылын: «Эзысь ныв» конкурсын вермысь Агния Игнатова; нывъяс вурöны дöмас;
Елизавета петкöдлö верöс сайö петöм водзвылын бöрдöдчöм.


Комментарии:

Добавить комментарий

Свежий выпуск: за 19 апреля