Енэжлöн бордъяс

[ A+ ] /[ A- ]

 

Февраль 9-öд лунö пасйим гражданскöй авиациялысь лун. Сылы тырис 95 во. Такöд йитöдын пасйышта, кутшöм туй тайö котырыс вуджис.
1923 вося февраль 9 лунö чужис ас окотаöн лэбалысь ставроссияса «Добролёт» котыр. Коми обласьтын 1923 вося май 15-öд лунö чужис сынöдса флотöс радейтысьяслöн котыр. 1925 вося август 14-öд лунö Усть-Сысольск дорса Сыктыв ю вылö пуксис Авиахимлöн ва вылö пуксьысь самолёт, код вылын лэбалысьяс, куим морт, ышöдiсны уджавны да овны бурджыка. Усть-Сысольскса да обласьтлöн лунвыв районъясса йöз самолёт аддзисны медводдзаысь. Сы дорö чукöртчылiсны йöз. На водзын сёрнитiсны сы вылын локтысьяс, а сэсся кыпöдлiсны енэжö. Медводдзаяс лыдын вöлi Виктор Савин, кодi бöрыннас гижис: «Коми обласьт весьтын медводдза бöрöзда вöчöма. Миянлы колö паськöдны сынöдса кöдзасö, мед эз россяв!» «Добролёт» управлениелöн индöдöн 1929-öд вося ноябр 2 лунö восьтiсны Архангельск-Усть-Сысольск авиалиния.
1935-öд воын восьтiсны Архангельск-Нарьян-Мар-Усть-Уса-Абезь-Воркута авиалиния, лэбалiс Р-5 самолёт. Сiйö вöлi 1930-1940-öд воясын Сöветскöй Союзын медся ёна лэбалысьöн, новлöдлiс йöзöс и висьысьясöс, мупытшса озырлунъяс корсьысьясöс и картаяс лöсьöдысьясöс, 1934-öд воын дорйис «Челюскин» ледоколвывса йöзöс, Великöй Отечественнöй война дырйи вöлi туясьысьöн да войнас бомбитысьöн.
1936-öд воын восьтiсны Сыктывкар-Ухта-Абезь авиалиния. 1936-öд вося январ 20-öд лунсянь коставлытöг кутiсны лэбавны Сыктывкар-Котлас-Архангельск авиалиния кузя. Тайö жö вося гожöмын восьтiсны аэропорт Мылдiнын. 1940-öд восянь коставлытöг кутiсны лэбавны Ухтаö, Чилимдiнö, Изьваö, Котласö да Архангельскö. 1946-öд воын Сыктывкарын котыртiсны нёль самолётысь висьысьясöс могмöдан звено. С-1 да С-2 самолётъяс лэбöдлiсны бурдöдысьясöс, висьысьясöс да бурдöдчанторъяс. Нёль ПО-2 самолёт могмöдiсны нефть да газ перйысьясöс, мупытшса озырлунъяс корсьысьясöс, стрöитчысьясöс, биысь вöр дорйысьясöс, вылiсянь снимайтчысьясöс. Транспортнöй звеноса квайт ПО-2 самолёт лэбалiс Сыктывкарсянь Косланö, Княжпогостö, Кулöмдiнö, Мылдiнö, Ухтаö, Изьваö, Чилимдiнö, Абъячойö да Кировö.
Миян район авиация сöвмöдöмö пуктiс ыджыд пай. 1935-öд восянь нин Кулöмдiнö почта вайлiсны самолётöн. Сöветъяслöн кадö аэропортъяс бура уджалiсны Помöсдiнын, Тимшерын, Югыдъягын. Öнi уна аэропорт тупкöса. А найöс колiс кольны кöть нин биысь вöр дорйöм да висьысьясöс новлöдлöм могысь. Изьваын аэропорт сiдзжö вöлi тупкöса, но пуксянiнсö кутiсны дасьлунын да 2010 вося сентябр 7-öд лунö пуксьылiс весиг, быть колiс да, ТУ-154 самолёт.
Чолöмала гражданскöй авиацияса ветеранъясöс сiйöс котыртöмсянь 95 во тырöмöн да сиа налы да семьяясныслы ён дзоньвидзалун да кузь нэм.
Дженьыдика ас йылысь. Чужи 1952-öд вося июль 19 лунö. Начальнöй школа помалi Парчын. 5-6 классъясын велöдчи Немдiнса шöр школаын. Томöн на сетчи авиацияö. 1966-öд воын пыри «Ракета» авиаклубö. Помалi Ригаса лётно-техническöй училищелысь радиотехническöй факультет. 1973-öд восянь 33 во вöлi Воркутаса аэропортын диспетчерскöй пунктса инженерöн.
Пётр ЛОДЫГИН.
Снимок вылын: Пётр Лодыгин
Воркутаын уджалiгöн.

Комментарии:

Добавить комментарий

Свежий выпуск: 28 марта

Осторожно — мошенники!