Елена Владимировна Игнатова уджалö Помöсдiнса школаын роч кыв да литература велöдысьöн 15 во.

[ A+ ] /[ A- ]

Ачыс Вочса. Верöсыскöд, Илья Анатольевичкöд, öтлаын велöдчисны Сыктывкарса университетын. Велöдчöм бöрся вужъясисны верöслöн чужанiнас. Гозъялöн куим челядь. Елена Владимировна став сьöлöмсö сетö уджыслы. Сылöн классысь Люция Пашниналöн таво роч кыв кузя экзаменысь вöлi 100 балл. 
— Люция — зэв шань да нырччысь нывка. Öттшöтш зiльöмöн ми вермим татшöм бура петкöдчыны. Таво менам вит мортлöн öтувъя экзаменысь 80-ысь да 90-ысь унджык балл. Меным зэв долыд таысь. Челядь велöдчöны зэв окотапырысь, найö верстьö моз нин мöвпалöны, кытчö водзö мунны школа бöрын, да бура велöдчöны. Татшöм челядькöд уджавны кокни. Менö пыр мöдöдлöны курсъяс вылö, öнiя кадö ёна отсалö интернет. Велöдысь — сiйö ачыс пыр велöдчö. Уджöс ёна радейта. Таво помöдi 11 класс, нывъяс да зонъяс петiсны асшöр олöмö, öнi босьтi 5-öд класс. Прöст кад колляла семьякöд, гожöмнас вотча, тöвнас котрала лыжи вылын. Аслам челядькöд ёна отсасьöны верöсöй да мамöй. 
Мелi да шань гöлöса Елена Владимировналöн сёрниысь шонавлiс сьöлöм. Чайта, сэтшöмöн и колö лоны бур велöдысьлы. 
Галина КЛЮЖЕВА. 
Снимок Илья ИГНАТОВЛÖН.

Комментарии:

Добавить комментарий

Свежий выпуск: 28 марта

Осторожно — мошенники!