Керчомъяса школа кыпöдöмсянь колис нин 40 сайö во. Та дыранад важмис. Торйöн нин лёк вöлi спортзал. Важ, кöдзыд. Дерт, кытсюрö быд во дзоньталышталiсны, квайт во сайын кык стен эжлiсны гипсокартонöн, но тайö ёна бурланьö серпассö эз веж. 
Велöдан управление тшöктiс чукöртны документъяс, мый водзö спортзал дзоньтавтöг уджöдны оз шогмы. Сьöм вичмис федерацияса бюджетысь. Босьтчис вöчны «Лысва» котыр, кодöн веськöдлö Я.С.Тарабукин. 
Спортзалын вöлi дзик вöйöмаöсь джоджъяс, ставыс сiсьмöма, вежыньтчöма. Найöс разьöм бöрын тыдовтчис, мый сiсьöсь и перевединъясыс. Зэв лёкöсь вöлiны öшиньяс, кöнсюрö стеклöыс öдва кутчысис рамаас. 
Уджъяс пансисны август помын. Талун кежлö вöчисны унатор: выльысь вольсалiсны джоджъяс, öшиньяс улысь öкмысöд брускöдз вежисны стенсö да ставсö эжисны шоныд кутан материалöн, пукталiсны пластик öшиньяс. Йирксö вöчисны гипсокартонöн. Пуктiсны кöрт öдзöс. Школаса директор Ирина Андреевна Кузнецовалöн кывъяс серти, спортзал лоас дась урчитöм кад кежлö. Эштöдасны сентябр помöдз. Тшöкыда волöны велöдан управлениеысь, видзöдöны, бура-ö дзоньтасьöны. 
Тайö спортзалын во чöж ёнмöдчöны оз сöмын велöдчысьяс, но и верстьöяс. Челядьлы урокъяс бöрын нуöдöны спорт секцияяс. Волывлöны спорт школаса велöдчысьяс. Волейболысь ворсны кежавлöны сиктса йöз. Танi мунöны ордйысьöмъяс. Во кык сайын ордйысьны корлiсны весиг Зимстанысь да Вочысь котыръясöс. И.А.Кузнецовалöн чайтöм серти, спортзал дзоньталöм бöрын волысьяслöн лыд ёна содас. 
Гижöд да снимок Галина Клюжевалöн.