Дорйисны йöзöс вöйöмысь

[ A+ ] /[ A- ]

Март 13 лунö республикаын Россияса МЧС-лöн медшöр управлениеöн веськöдлысь Александр Князев сетiс «За спасение погибающих на воде» медальяс Кулöмдiнысь Александр Иванович Нестеровлы да Николай Николаевич Чалановлы. Кыкнанныс кольöм воын юрсиктын дорйисны вöйысьясöс.
Николай Николаевич олö ва дорын. Гортса удж бергöдöм бöрын рытнас вöлi ывлаын. Кылiс мотора пыжлысь мунöм, а сэсся кытчöкö зурасьöм шы, и лоис лöнь. Видзöдлiс, но бадьяс пыр нинöм эз казяв. Эз тыдав и керкалöн мöд судтасянь. Но вежöртiс, мый кодкöдкö мыйкö лоис. Ытва дырйи ва волö керка подулöдз да пыж вöлi öшинь улас. Тэрыба пасьтасис, пуксис пыжö да петiс ва вылö. Аддзис бадьяс пиысь керъясö шашаритчöм куим мортöс. Кынмöмаöсь ёна нин, весиг эз вöрны чуньяс да эз вермыны кутчысьны мыччöм пелысö. Öдва лэптiс пыжö öтиöс, сэсся мöдöс. Коймöдыс вöлi ылынджык, эбöстöммöма дзикöдз нин, но вермис дорйыны и сiйöс.
— Минут дас мысти найö эськö пöдiсны. Лэптавнытö лэпталi, а кынмöмысла эз вермыны весиг чеччыны пыжысь. Бара öдва перъялi найöс. Шебрасöн да пöсь чайöн миян дорö локтiс ва дорын жö олысь, «тэрыб отсöг сетан» юкöнса бурдöдысь Людмила Анатольевна Липина. Вöйысьяс пиысь сöмын öти мунiс ас кокнас. Кыксö катöдiм кык боксянь кутöмöн. Куимнанныс кывтыдсаяс, тöдсаöсь, ёна и аттьöалiсны мездöмысь, — казьтылiс Николай Николаевич.
Айлов оз радейт ошйысьны. Кад кольöм бöрын удж вылын, а сiйö «Шоныд сетан Коми компаниялöн» Кулöмдiнса юкöнын ломтысьысь, кыйсьöм-вöралöм йылысь сёрнитiгöн и висьталiс лоöмтор йывсьыс. Öтлаын уджалысь юöртiс ичöт суднояслöн инспекцияö.
Йöзöс ва пиысь мездö оз медводдзаысь. Во сизим сайын тадзи жö тулысын Николай Николаевич дорйылiс кык вöйысьöс. Александр Иванович Нестеров ваысь перйис чоя-вокаöс.
Марина ДАДАШОВА.
МЧС-са медшöр управлениелöн снимок вылын ( шуйгавывсяь веськыдвылö): Н.Н.Чаланов
да А.И.Нестеров.


Комментарии:

Добавить комментарий

Свежий выпуск: за 18 октября