Домалöй понъястö!  

[ A+ ] /[ A- ]

Водзтi сиктын матö быд овмöсын видзлiсны мöс. Бöръя кызь воöн налöн лыдыс ёна чинiс, öнi этшалöн нин картаад эм баксысьыд. Зато лöсьöдiсны понъясöс, весиг найö, кодъяслöн нэмсö эз вöв. Тадзи и Донын. 

Мöснад öд нокыд уна: вердны, сёöдны, луд вылын видзны-йирсьöдны, турун пуктыны, куйöд петкöдны. А понтö лэдзан да ачыс, тон, кыськö сёйнысö корсяс, сiт весавны оз жö ков — бокö ветлас. Кымынысь öлöдлi орччöн олысьясöс, мед, лöсьöдiсны кö, эз лэдзны поннысö йöр сайö, видзисны дом йылын. А найö шуöны: миян пö оз курччась. Понйыд тай пон на и эм, некор он тöд, котöртас тэ боктi али вувзьысяс лёкысь. Сэсся и градъяс лойöны-кодйöны. Неважöн ньöби джерсийскöй пöрöдаа ялавич мöскöс. Вайим Москваысь. Лэдзи потшöм йöрö йирсьыны. Кад кольыштöм бöрын, видзöда да, орчча олысьлöн кык пон котрöдлöны коньöрöйöс йöр пасьта, быттьö налöн сэнi кутшöмкö велöдчанiн. Дорйи сюрукöс. Орччöн олысьöс öлöдi: мыйкö кö лоас мöскöд, донсö перъя сылысь, öд сыысь вештi вель ыджыд сьöм. 

Менам нылöй велöдчöм бöрын вöлi практика вылын Кöрткерöс районса Висерын. Сiйö висьталiс, мый сиктас дзик став понйыс дом йылын. 
Мöдтор, мый ёна дзугыльтö сьöлöм — йöзлöн дурклун. Донын, кытчö он видзöдлы, быдлаын лöп-ёг. /нi гожöмнас тырис турунöн да азьгумöн, озджык тыдав, кыдзи гöгöр пежöсьтöма, а тулыснас мый керсьö, аддзылiнныд кö! Эм кö керка öшинь улын гуран, сэтчö и петкöдöны став шыблассö да коляссö. Ветлöдлö овмöдчöминлöн трактор, вешты сё шайт, и сiйö нуас гортад чукöрмöм лöп-ёгтö, кытчö колö. Нимъяссö ог висьтав, пыдди пуктана йöз да, но казялан: йöрныс дзим-дзурк, быттьö серпас вылын, а став ковтöмторсö шыблалöны йöрсайса гуранö. Абу öд мича, и ставныс тайö аддзöны. Сöмын татшöмъясыслöн яндзимыс абу. 

Валентина Тимушева. 
Дон.

Комментарии:

Добавить комментарий

Свежий выпуск: 28 марта

Осторожно — мошенники!