Подулын — ыджыд сям
Миян корреспондент аддзысьлiс электрическöй сетьяслöн районса начальник Алексей Михайлович Тарабукинкöд да корис висьтавны, кутшöм вермöмъясöн котыр пасйö удж кузя праздник.
— Миян удж — электроэнергияöн могмöдöм. Сiйöс вöчим кывкутöмöн: кольöм воын серти миян вöсна би куслiс этшаджык. Тайö бур уджалысь котыръяслы и йöзлы, öд пыр унджык школа, сад да мукöдтор, тшöтш и оланiнъяс, шонтöны электроэнергияöн, ме ог нин шу бытöвöй техникаöн да мукöдторйöн вöдитчöм йылысь.
Ми бара вермим доймöмъясысь видзчысян районса конкурсын. Уджъяс вöчим кольöм воын серти ёна унджык: 21 километр пыдди дзоньталiм 33 километр электролиния.
— Кыдзи тайöс сямминныд вöчны?
— Миян котырын 82 морт. Йöз пöшти оз вежласьны. Ставлöн ыджыд уджалан сям. Та вылö видзöдтöг, водзö кыпöдöны тöдöмлунъяс вылыс тшупöда да шöр тшупöда велöдчанiнъясын. Быд во унаöн ветлöны Сыктывкарö курсъяс вылö. Быд тöлысь öти лун велöдам районса быд юкöнысь специалистъясöс. Эм сям кыпöдöм могысь велöдчан план. Миян котырын ыджыд сяма мастеръяс. Та вöсна корлöны уджавны весиг мукöд районъясö. Быдногыс ошкам да нимöдам бур специалистъясöс. Тайö и бур уджлы подув.
— Ыджыд-ö овмöс, кöнi да мый вöчинныд?
Миян видзöдлас улын сюрсысь унджык километр электролиния, кыксёысь унджык подстанция. Выльмöдiм 3 километр Руч-Дереваннöй, 1 километр Кулöмдiн-Дон, 2,5 километр Немдiн-Мыс, 6,5 километр Помöсдiн-Вöльдiн электролинияяс, дзоньталiм электрическöй линияяс Донын, Тимшерын, Пожöгдiнын, вежим 32 сюръя Вочын да с.в. Уджалiм сiдзжö Помöсдiнын, Тимшерын да мукöдлаын. Помöсдiнын сюръяяс вежлалöм вылö сьöм йöзлöн корöм серти вичмöдiс «Комиэнергоса» директор, Госсöветса депутат И.В.Медведев. 2013 вося медводдза кварталын Помöсдiнын вежлалам проводъяс. Сувтöдiм сiдзжö выль подстанцияяс районса администрациялöн керка бокö, ветлечебница дорö, Помöсдiнö, Югыдъягö да кыкöс Аныбö. Бöръяас — йöзлöн корöм серти. Ставсö йöзлöн корöм серти вöчим 163-тор.
— Ме тöда, мый ёна отсасис Кировысь 24 номера мехколонна.
— Ягкöджын школа вöчöм бöрын (шонтöны сiйöс электричествоöн) посёлокын эз кут тырмыны электроэнергия. Та вöсна нюжöдiсны Помöсдiнсянь Вöльдiнöдз содтöд электролиния да сувтöдiсны Ягкöджын подстанция. Öнi пузласаяслы да ягкöджсаяслы майшасьны электричество вöсна оз ков. Нюжöдiсны сiдзжö электролиния Немдiнсянь Мысöдз. Тайö йитчöма Мысын школа-сад лэптöмкöд. Линияяс вöчисны выль технология серти, нюжöдiсны кыша провод. Сэтшöм жö лоö и Помöсдiнын.
— Кутшöм уджъяс нöшта вöчинныд?
— Весалiм Шойнаты-Кулöмдiн, Керчомъя-Зимстан, телецентрö, Дереваннöйö, Белоборскö мунысь электролинияяс улысь леторос, ставсö 80 гектар. Тöв кежлö дзоньталiм техника. Выльсö важöн нин эз сетлыны. Ёна отсалö лым вывтi ветлан «Тайга». Но медся бур ёртöн, кыдзи и водзтi, лоö лямпа.
— Тiян котырын ёна пыдди пуктö спорт.
— Ми сетам сылы ыджыд тöдчанлун, сы вöсна мый спорт отсалö уджавны. Кольöм воын вермим Лунвыв электрическöй сетьясöн нуöдан спартакиадаын. Эска, мый и таво лоам медводдзаöн. Республикаса юралысь В.М.Гайзер локтан восö шуис спорт воöн. Кутам сöвмöдны сiйöс водзö.
— Мый кутанныд вöчны водзö?
— Кутам выльмöдны ассьыным подстанция. Вичмöдасны 180 миллион шайт. Эм нин бала, медым нюжöдны би Кулöмдiнын ас керкаяс лэптанiнö. Водзö сувтöдам выль постанцияяс, вежлалам линияяс да с.в.
Праздниккöд йитöдын ставнысö аттьöала бур уджысь. Чолöмала энергетикъясöс, вöвлöм уджалысьясöс да ставныслысь семьяяснысö асланым лунöн, сиа ставлы ён дзоньвидзалун, шуд. А районса олысьяслы сиа, медым керкаясын пыр вöлi югыд да шоныд.
Николай ЛЮТОЕВ.
Авторлöн снимок вылын: электрослесар А.Д.Лопырев, мастер М.Н.Сенькин да электромонтёр А.И.Есев.