Ёртъяссянь чолöм

[ A+ ] /[ A- ]


Моз тöлысьö ассьыс тшупöда пас тыртö коми поэт Вячеслав Леонидович Бабин. Сылöн гижан сямыс петкöдчис водз, да кыскисны «Эжва» литературнöй котырлöн уджö. Тайö вöлі вылыс эжвасалöн шуда кад — öтлаынмоз литератураö пырöдчисны енбиа куим детинка: Славикысь кындзи воисны Эдик Тимушев да Саша Лужиков. Ставныс уджавлісны да сöвмöдлісны киподтуйсö Кулöмдін районса «Ленин туйöд» газетын. Дерт, татшöм ёртасьöмыс быдöнлы мыйкö сетіс.
Медводдза гижöдъясыс В.Бабинлöн чужöмаöсь школаас велöдчигöн на. Медводдза кывбуръяссö йöзöдіс «Ленин туйöд» газетын. Та бöрын гижöдъясыс петісны и «Войвыв кодзув» журналын, öтувъя сборникъясын. 1989 воын кассетнöй сборникöн петіс сылöн медводдза асшöр книга. Вячеслав гижö и верстьöлы, и челядьлы сьöлöмсянь да югыд нюм пыр, тöдчö, мый радейтö ассьыс геройяссö да найöс кытшалысь вöр-васö. Вячеслав Леонидовичлöн бура артмö и гижны заводитысь войтыркöд удж-сёрниыс, стöча индö шыбöльяс вылö да вöзйö колана мöвпъяс.
1993-öд воын Вячеслав Бабин отличиеöн помаліс А.М. Горький нима литературнöй институт. А 1994 восянь — Россияса гижысь котырын.
Гижысьлöн асшöр книгаяс: «Сьöлöмшöр», «Öктö Коля коляоз», «Вуджöр», «Вöрса чай» да мукöд.
Чолöмалам Вячеслав Леонидовичöс чужан лунöн, тшупöда пасöн! Сиам лоны дзоньвидзаöн, шудаöн да дыр на нимкодьöдны коми йöзöс аслас творчествоöн! Кузь нэм да бур шуд!
Гижысь ёртъяс.

Комментарии:

Добавить комментарий

Свежий выпуск: 28 марта

Осторожно — мошенники!