Ёнмöдчытöг некыдз

[ A+ ] /[ A- ]

Тайö шань, вежавидзысь да восьса сьöлöма морт йывсьыс, кыдз бур велöдысь йылысь, медводз кылi аслам нывсянь. Лöсьыда пö нуöдö урокъяс да асьтö сы дырйи кылан бура, велöдысьысь он пов. 
Павел Николаевич Лютоев чужис-быдмис Кулöмдiнын. Спортö пырöдчис дзолядырсяньыс. Ыджыд классъясын физкультура велöдысь Василий Егорович Шахов весиг лэдзлiс зонлы нуöдны урок водзын ки-кок песöм. И, дерт, Павеллы таысь вöлi зэв нимкодь. Ичöт классянь котралiс лыжиöн. Дыр мöвпавтöг сэсся и артмис, мый школа помалöм бöрын водзö пырис велöдчыны öтиöд номера педколледжö физкультура велöдысьö. Помалöм бöрын босьтiсны армияö, веськалiс Санкт-Петербургö связьлöн войскаö. Сэнi, дерт, ёна отсалiс дзоньвидза олöм пыдди пуктöм да физкультурникö велöдчöм. Армияын Павеллы урчитiсны нуöдны салдатъяслы зарядка. 
Армия бöрын весиг мöвп эз вöв кытчöкö мунны овны бокö. Зонмöс кыскис чужанiнас, кöнi сiйöс виччысисны муса ныв да кагаыс, рöдвуж. Медводз уджыштiс методистöн велöдан управлениеын. 2010-öд воын вуджис школаö. Велöдiс ОБЖ, сэсся босьтчис нуöдны физкультура. 
Öнi Павел Николаевич веськöдлö кадетъяслöн классöн. Сылы зэв нимкодь, öд уджыс зэв кывкутана. Топыд йитöд колö кутны оз сöмын челядькöд, но и налöн бать-мамкöд. Найö пыдди пуктöны велöдысьöс. Челядьлы нимкодь велöдчыны том шань учителькöд, оз повны сы дорö шыöдчыны кöть кутшöм юалöмöн. 
Спорт Павел Николаевичлы лоö медтöдчанаторъяс лыдын. Сiйö котралö, ворсö футболысь. Вежоннас кыкысь ветлöдлö «Олимпик» ёнмöдчанiнö. Петкöдчö вермасьöмъясын. Ворсысь котыр петавлö вермысьяс лыдö. Том морт быд во петкöдчö районлöн лунлы сиöм да «Нацияяслöн кросс» котралöмъясын. Кольöм воын районлöн лунлы сиöм ордйысьöмын вермис. 
— Спорт — тайö менам олöмын медрадейтанатор, кор кыпалö лов. Быттьö томман, мича туша-мыгöрыд, гежöдджыка висян. Öнiя челядьöс сьöкыд кытчöкö кыскыны, а дзоньвидзалун видзны колö ёна, — висьталiс Павел Николаевич. 
Школаын урокъяс нуöдöмысь кындзи, П.Н.Лютоев лоö ичöт футбол кузя тренерöн. Сы дорö ветлöдлöны 8-11-öд класса зонъяс. Волывлöны окотапырысь, весиг эмöсь сiдз шусяна «сьöкыд» челядь, кодъяскöд Павел Николаевич аддзис öти кыв. 
Зэв казьтыланаöн колис, кыдзи некымын во сайын велöдчысьяскöд петкöдчисны «Зарницаын» да лоисны медводдзаöн. И весиг карын ставнысö вермисны. Та бöрын ветлiсны Тулаö, Россия тшупöда ордйысьöм вылö. Сэтчö чукöрмылiс страна пасьтаысь 50 гöгöр котыр. Петкöдчисны бура, но эз вермыны, вöлi зэв сьöкыд. А казьтылöмъяс колисны пыр кежлö. Öд сэки зонъяслöн киясö веськавлiс збыль бур автомат, кодöс öнiдз некор на эз аддзывны. Колö пасйыны, мый Кулöмдiн районысь «Зарницалöн» Россия тшупöдö некод на эз ветлы. Сiдзжö Павел Николаевичлöн велöдчысьяс петкöдчöны физкультураысь олимпиадаясын, районса да республикаса тшупöда вермасьöмъясын, классыс — сьылöмöн да стройöн ветлан смотрын. 
— Меным воö сьöлöм вылö уджавны велöдысьöн. Чайта, мый олöмын бöрйи бур туй. Менам семьяын меöдз спортсменъяс эз вöвны. Быдми бать-мамкöд, эм ыджыдджык Алексей вок, кодi уджалiс полицияын да öнi шойччöг вылын. Ме чайта, мый спортö туй меным чуйдiс Анна Николаевна Чаланова медводдза велöдысьöй, кодi вöзйис миянлы котравны лыжиöн. Дзик пыр и гижöдчи. Тренерöн вöлi Б.М.Чаланов, сы бöрын А.И.Мишарин. Наяссянь и мусмис меным спорт, — висьталiс Павел Николаевич. 
Дас во нин том зон тöвъяснас купайтчö йöрданын. Оз, бара-й, пов кöдзыдысь. 
Уджалöм да ёнмöдчöм кындзи, зон пырö ас кöсйöмöн отсасьысьяслöн «Бурлунлöн туйöд» öтмунöмö. Отсасьö пöрысь öтка йöзлы, отсалö нуöдны гажъяс. 
Дерт, медшöрыс да медтöдчанаыс сылöн олöмын — семья. Павеллöн Анастасия гöтыр да кык ныв: 11 арöса Милана да куим арöса Алина. Ыджыдджыкыс ветлöдлö Татьяна Ивановна Сидоренко дорö ворсны волейболысь. Батьыс лоö нылыслы бур примерöн. Павел Николаевич пыр öлöдлiс компьютер сайын пукалöмысь. Öнi ошкö спортö пырöдчöмысь. Векжö корсюрö чирыштлö, Милана кö дышöдчö мунны тренировка вылö. Кывзысьö. 

Галина Клюжева. 
Снимок интернетысь.

Комментарии:

Добавить комментарий

Свежий выпуск: за 26 марта