Ёгор Педöсьлöн пиян

[ A+ ] /[ A- ]


Пожöг. Вичкодор. Прокö Öлексанлöн ыджыд котыр. Кöзяин — Александр Прокопьевич Шахов, кöзяйкаыс — Феодосия Егоровна, челядь-йылöмыс — Николай, Наталья, Алексей, Олимпиада, Георгий (Ёгор), Степан, Василий, Иван, Фёдор. Пожöг сиктын тайö семьяыс нималiс шуда да бур оласногöн. Но Прокö Öлексан водз мунiс олöмысь. А Ёгор Педöсь, кöть кутшöм сьöкыдлунъяс эз паныдавлы, сяммис зумыда сувтöдны кок вылö ставнысö. Миколай да Ёгор нимöдiсны асьнысö коми литератураын. Ас кадö вöлiны коми гижысьясöн.
1919-1920-öд воясö Н.А. Шахов велöдiс Скöрöдумын. Танi жö и гöтрасис Анна Ивановнакöд. Öтув мунiсны карö да босьтчисны уджавны литература туйвизьын. Веськöдлiс коми книга лэдзанiнöн. Война водзын Миколай чож бергöдчис Таджикистанысь Москваö. Уджалiс РСФСР-ын велöдöмлöн народнöй комиссариатын. Война пансьöмöн пыр жö гижсис прöстöй йöзысь ополченньöö да веськöдчис фронт вылö мездыны Москва. Сьöкыда висьмис да мöдöдiсны Уфаö. Танi сiйö и кувсис 1942-öд вося май 22-öд лунö.
Миколай чожлöн семьяыс пыр олiс Москваын. Анна Ивановна кок вылö сувтöдiс кык пиöс да кык нылöс. Ставныс тöдöмлун босьтiсны вылыс тшупöда велöдчанiнъясын. Батьыслысь кок туйсö талялiс Борис пиыс. Лоис гижысьöн да серпасасьысьöн. Öнi чожлысь вужсö водзö паськöдö Николай внукыс. Кöть и чужис да быдмис Москваын, оз вунöд ыджыд батьыслысь чужанiнсö. Некымынысь нин волiс Комиö, лöсьöдiс ордпу.
Войнаöдз Степан да Вась уджалiсны Пожöгса «Дружба» колхозын. Вась — конюк, а Степан — кер дорын. 1941-öд воын вокъясöс чукöстiсны фронт вылö. Степан вöлi радöвöйöн, а Вась — сержантöн, отделениеса командирöн. Веськалiсны Карелияса фронт вылö. 1941-öд вося ноябрын чорыд тышъясын вокъяс пöгибнитiсны. Öнöдз абу тöдса налöн туй помыс. Öтлаын служитысь Польеса öти салдат мöдöдлiс гортас письмö, мед пö Прокö Öльöксан Степанöс гортас оз виччысьны, öти тышын пö син водзын лэбзис сылöн юрыс. Ёна и бöрдлiс Олимпиада (гижысьяслöн мам) тайö кылöм бöрын. Да и ыджыд мамлöн кулiс сьöлöмыс — война кадö и мунiс олöмсьыс.
Öлексей чожöс война вылö босьтiсны 1942-öд вося майын. Мездiс Ленинград, мыйысь пас-йисны «За оборону Ленинграда» медальöн. Вöрöгкöд тышкасис Победаöдз. Гортас бергöдчис 1946-öд вося февральын. Алексей Александрович уджалiс Пожöгын почтаса начальникöн, райсöветса председательöс вежысьöн. Дыр овны эз артмы, 1952-öд воын мунiс олöмсьыс.
Öлексей чожлöн колисны челядь: Борис, Геня, Нина, Ревир. Ставныс петiсны ас олöмö. Нина Алексеевна Сыктывкарса медучилище помалöм бöрын воис батьыслöн чужанiнö да Пожöгын уджалiс акушеркаöн, а сэсся фельдшерöн. Нелямын воысь дырджык тöждысис йöзлöн дзоньвидзалун вöсна. Öнi шойччöг вылын.
Педе чож чужис 1924-öд вося февраль 20-öд лунö. Аслас олöм да война йылысь казьтывлiс: «Пожöгын сизим класс помалöм бöрын мунi велöдчыны карö. А 1942-öд вося август 14-öд лунö сетiсны повестка, корисны кöрттуйса райвоенкоматö, мед мунны фронт вылö. Сiйö жö лунö сöлöдiсны вагонö, Княжпогост пыр нуисны Котласö. Сэсянь пароходöн Архангельскö. Артиллеристъяслöн 12-öд полкын тöлысь дасьтiсны фронт вылö петiгкежлö. Мöдöдiсны Ленинград обласьтö чорыд тышъяс вылö. 1943-öд вося январын, кыдзи пулемётчик, тышкаси Новгород вöсна. Танi жö öтувтiсны зенитчикъяслöн вынаджык Сибирса полккöд. Тышъяс нуöдiм Новгород да Выборг каръяс вöсна. Ленинград мездöм бöрын шыбитiсны Украинаса медводдза фронтö. Чорыд тышъясын воöдчим Польшаöдз. Паметьö колис Краков кар мездöм. Танi ковмис венны уна сьöкыдлун, но Победа век жö шедöдiм. Эз кокниöсь вöвны и Одер ю дорын тышъяс. Ыджыд вермöм вочаалiм Германияын. Та бöрын полкнымöс мöдöдiсны Чехословакияö, вöлiм и Венгрияын. Рытыввыв Украинаын ковмис тышкасьны бендеровечьяскöд. Гортö вои сöмын 1947-öд вося январын». Синва сора чожлöн татшöм казьтылöмыс. Вит воöн пö аддзылi быдсяма лёксö, да ачыс шензис, кыдз колис ловйöн, кор усисны орччöн мунысь салдатъяс.
Фёдор Александрович Шаховлöн морöс тырыс вöлi орден да медаль, нималана маршалъяссянь аттьöалан гижöдъяс.
Война вылысь локтöм бöрын недыр овлiс Пожöгын, а сэсся мунлiс Оренбург обласьтö. Уджавлiс кöрт туй дзоньталанiнын. Танi жö аддзис радейтана нылöс, гöтрасис. Быдтiсны нёль пиöс.
Но чужанiнад тай морттö век на кыскö. Кольöм нэмся 60-öд воясын став семьянас волiс Пожöгö. Уджавлiс Великопольеса лесопунктын вулканизаторöн. Вöлi зiль, киподтуя, йöз дорö сибалысьöн. Квайт во мысти бöр мунiсны важ оланiнас, мед эз вош уна воясöн лöсьöдöм керка-овмöсныс. Чож эз вунöдлы чужанiнсö да Коми мусö, сёрнитлiс комиöн да письмöяссö грамотнöя гижлiс чужан кыв вылын.
Ми ветлiм видлыны Медногорскас, да пыр и шыасьлiс комиöн. Педе чож öнi абу нин ловъя. Ыджыд семьяысь сiйö мунiс медбöръяöн 2010-öд воын. Буретш сiйö воын Ф.А. Шахов бöръяысь ветлiс Победалöн парад вылö да миянлы ыстiс снимоксö.
Ми, Прокö Öлексан да Ёгор Педöсь вужйысь петысьяс, век кутам помнитны чожъяснымöс, кодъяс, кыдзи и мукöд, дорисны Победа.
Ыджыд Вермöмлы 75 во пасйигöн кувлытöм полкын чожъяслысь мыгöръяссö кутам нуны Медногорскын, Москваын, Помöсдiнын, Пожöгын да Немдiнын. И быдöн кутас кывны, мый найö мунöны миянкöд орччöн.
Редция Попова,
Павлин Попов,
Нина Гуляева.

Снимокъяс вылын: Степан Александрович , Фёдор Александрович, Василий Александрович, Николай Александрович Шаховъяс

Комментарии:

Добавить комментарий

Свежий выпуск: за 9 июля