Январ 25-öд лун — студентъяслöн лун

[ A+ ] /[ A- ]


Керчомъяысь Татьяна Юрьевна Ваддорова таво медводдзаысь кутас пасйыны студентъяслысь лун. Сiйö медводдза во велöдчö сервис да связь кузя Сыктывкарса колледжын бухгалтерö. Позьö шуны кык пöвста гаж. Чужан луныс январ 19-öд лунö. Буретш матысса кадö пасйöны Таттян лун да сы вöсна бать-мамыс сетiсны татшöм ним.
Татьяналöн ыджыд семья. Нина Васильевна мамыс уджалö садйын воспитательöн, Юрий Васильевич батьыс öнi шойччöг вылын. Эмöсь вок да чой. Татьяна чужанiнас помалiс 11 класс. Велöдчис бура. Öттшöтш тöдöмлун босьтiс сиктса енбиа челядьлы лицейлöн финн-йöгра юкöнын. Водзмöстчысьöс да ас гöгöрыс öтувтны кужысьöс и школаын и лицейын бöрйылiсны старостаöн. Триньöбтiс бöръя звöнок. Сьöкыд вöлi янсöдчыны велöдысьяскöд да öтлаöн велöдчысьяскöд. Но колiс велöдчыны водзö. Челядьдырсянь радейтiс артасьны да сы вöсна и бöрйис бухгалтерлысь специальносьт. Öдйö и тöдмасис республикаысь воöм том йöзкöд, аддзис бур ёртъясöс. Татьянаöс и танi, велöдчысьяслöн котырын, бöрйисны старостаöн. Студентъяслöн гажа олöм воис сьöлöм вылас. Дерт, овлö и сьöкыд, но кужö корсьны петан туй. Прöст кадö кысьö, ворсö волейболысь. Медым кокниджыка бергöдчыны сьöмöн, пырис уджавны. Удитö ставсö.
Матысса кадö сессия. Дасьтысьö кывкутöмöн, мед бура сдайтны экзаменъяс.
Галина КлюжевА.
Снимок Татьяна Ваддоровалöн чукöртöмысь.

Комментарии:

Добавить комментарий

Свежий выпуск: за 26 марта