Юрсиктлöн водзö вежсьö чужöмбан. «Гöгöртас лöсьöдöм» программа серти «Кулöмдiн» овмöдчöминлöн администрация олöмö пöртö куим бала. Июнь 19-öд лунсянь «Евро-Уют» котыр босьтчис нин выльмöдны Великöй Отечественнöй война вылын  усьöмъяслы пас. Сiйöс мöстилöалiсны. Лэдзисны Мам-героиня пас да ыстiсны выльмöдны. Дöрапас вылысь весаласны важ краскасö да мавтасны выльысь. Стелалöн, кытчö гижöма Великöй Отечественнöй война вылын усьöмъяслысь ним, вич да овъяс,  каркасыс пуысь, эжöма кöртöн. Сiйöс вöчасны выльöс, лоас дзоньнас сiмтöм кöртысь. Вежлаласны пас гöгöрысь потöм да жугласьöм плитаяс, сувтöдасны квайт выль лабич да сы мында жö  шыбласъяслы дозъяс. Югзьöдасны. Кык лампа  веськöдасны пасланьö, сы мындаöс жö пас дорö матыстчанiнö. Вöчасны дзоридзьяс пуктанiн. Тайö бала олöмö пöртны вичмис öти  миллион 426 сюрс шайт.

Июнь 21-öд лунсянь асшöр уджалысь Р.В.Третьяковлöн котыр вöчö Гагаринлöн уличавывса челядьлöн паркö пыран туй. Аэропортö мунан туйсянь сэтчö кежанiн вомöн сюйисны ва мунан труба. Кодйисны туй пöлöныс. 200 метра туй юкöн вылö ваялiсны лыа, шыльöдiсны-топöдiсны техникаöн. Парк дорын лоас  5-6 дзоля машиналы, мопедъяслы сулаланiн. Öшöдасны квайт лампа. Югзьöдöм бöрын вöчöм туй вылö вольсаласны посни из сора лыа.

— Паркыс туйысь бокын. Сэнi оз ветлыны машинаяс. Сöстöм сынöд. Эм челядьлы ворсанiн. Вöчлiм нин пырны Гагаринлöн улича вывсянь москияс. А паркö волывлöны и медводдза садйысь челядь, шöр школаысь посни классъясса велöдчысьяс, Ленинлöн улича вылын олысь челядь да бать-мам. Со и мöвпыштiм вöчны бур туй. Школаын велöдчигöн на котравлi тайö паркö. Зонпосни да томулов ворслiм футболысь да волейболысь. Сiйö 400 сюрс квадрата метр ыджда. Водзö вылö позьö  лöсьöдны ёнмöдчанiнъяс, вöчны мукöдтор. Вöзйи нин асшöр уджалысьлы, кодi районса культура керка водзын котыртлö челядьлы квадроциклъясöн ветлöм, вуджны татчö. Эска, выль туй вöчöмöн да тöлын сiйöс лымйысь весалöмöн, ворсанiн югзьöдöмöн парк во гöгöр чöж лоас уна йöза, — сёрнитiс «Кулöмдiн» овмöдчöминса администрацияöн  веськöдлысь В.П.Игнатов.

А сэсся асшöр уджалысь  Р.В.Третьяковлöн котыр босьтчас лöсьöдны-бурмöдны Набережнöй улича вылын вичко весьтсянь 44-öд керка дорöдз туй юкöн. Шыльöдасны бульдозерöн. Ваясны посни из сора лыа. Туй вылö вичмис 881 сюрс  шайт. Сэнi жö югзьöдасны. Би нюжöдны торйöдiсны 1 миллион 86 сюрс шайт.

Став уджсö урчитöма эштöдны октябрöдз.

Марина ДАДАШОВА.

Гижысьлöн снимок вылын:

асшöр уджалысьöс вежысь В.Н.Тюрнин, бульдозер вылын уджалысь П.Б.Мартюшев да туй веркöс топöдан техника

вылын уджалысь А.В.Касев.