«Юрганын» миян Евгения

[ A+ ] /[ A- ]


2019-öд восянь Евгения Клаткевичлысь нимсö ми тшöкыда кутiм кывны телевизорысь, стöчджыка кö «Юрган» телеканалысь, кöнi тайö нылыс уджалö репортёрöн.
Евгения чужис Югыдъягын, вöрса посёлокын. Быдмис Людмила мамыскöд да Зоя пöчыскöд. Котралiс «Дзоридз» садйö, бура велöдчис Югыдъягса шöр школаын. Аддзис кад сьывны культура керкаын. Нывка петкöдчис быд гажын, школаса да районса конкурсъясын. Кор Евгения пырис Сыктывкарса госуниверситетö, ме чайтi, мый и сэнi дзирдыштас. Та йылысь юалi да сiйö вочавидзис, мый оз артмы, öд уна кад босьтö велöдчöм. А колö пасйыны, мый Женя велöдчис зэв бура, нöшта на уджалiс дикторöн «авторадиоын».
Журналистика факультет помалöм бöрын Евгения петкöдчис конкурсын, мед стажируйтчыны Америкаын да вермис, ветлiс 2019 воын гожöмнас. Аслас нырччöмöн, бур паметьöн да сёрниöн Евгения унатор нин шедöдiс олöмас. Сiйö варов, сыкöд кокни, кужö сёрнитны быдöнкöд, сы вöсна сылöн репортажъяс интереснöйöсь да аслыспöлöсöсь, петкöдчöны уна боксянь. Быд лун ми виччысям «Юрган» телеканалысь передачаяс и тайö абу сöмын сы вöсна, мый миянлы муса Коми республика да кöсъям тöдмавны выльторъяс, а нöшта и мед аддзывны миянлысь Евгения Клаткевичöс. Став бурсö тэд, Евгения да ыджыд шуд.
Валентина ЮШКОВА,
олöмаяслöн Югыдъягса котырöн веськöдлысь.

Комментарии:

Добавить комментарий

Свежий выпуск: за 13 февраля