Эновтiсны, вунöдiсны, кисьтiсны

[ A+ ] /[ A- ]

Кулöмдiнын Липинлöн улича бокса ичöтик кушинын синмад ылiсянь шыбитчö кöрта-бетона плитаяс чукöр. Куйлö и куйлö сiйö, и вермö-ö кодкö мöвпыштны, мый тайö коркö вöлi матö нэмсайся шог лоöмторъяс йылысь казьтылан пас. «П» сикас сяма подулыс сулалö зумыда на, а вылысса юкöныс пöрöма, туплясьö бокас. Пемдöма-мисьтöммöма, муртса тыдыштö гöрд рöмöн коркö мавтлöм звездалöн мыгöрыс. Помнита, коркö школаын велöдчигöн на классöн миянöс вайлiсны экскурсияöн тайö памятник дорас. Сэки еджыдöн мавтöм да ляпкыдика потшöм тайö пасыс помтöм-дортöм му шöрын бура тыдалiс ылiсянь. Висьтавлiсны, мый сувтöдлiсны сiйöс гражданскöй война дырйи усьöмъяслы. А кор сiйöс вöчлiсны и мыйла колис дöзьöртöг — öдвакö кодкö вермас висьтавны. Öнi сiйö местасö сьöкыд нин тöдмавнысö, сы вöсна мый танi нюжалiсны выль уличаяс, кыптiсны выль керкаяс. И казьтылан паслöн öнiя серпасыс оз ёна гажöд инсö. 
— Водзын татi Шöр уличасянь нюжалiс Сосновка пыр Кужйö мунан веськыд туй, — висьталiс Кулöмдiнысь Валентина Степановна Лебедева пас дорö сыкöд волiгöн. — Весиг аэропортыс на сэки эз вöв (вöлi сiйö мöдлапöлын). Тайö местаас вöлi шойна. Татчö дзеблiсны на ыджыд мамлысь мамсö. Ыджыд мам висьтавлiс, мый гражданскöй война воясö Керчомъяысь еджыдъяс вайöмаöсь куим айловöс. Дерт, кöнкö, гöрдъясöс, öти вой узьтöдöмаöсь КПЗ-ын, кодi вöлi öнiя госпромхоз керкаын. Мöд лунас нуöмаöсь шойна дорас, тшöктöмаöсь аслыныс кодйыны гу. Сэсся лыйлöмаöсь да дзебöмаöсь сэтчö. Ыджыд мамлöн чойыс сiдзжö казьтывлiс, мый тайö КПЗ-ас сiйö воясын вайлöмаöсь и Домна Каликоваöс, узьтöдöмаöсь öти вой да мöд лунас катöдöмаöсь кытчöкö вывлань. Коркö 1930-öд воясын, кор котыртчисны колхозъяс, шойнасö гöрисны ставнас, вöчисны му. Сöвет кадö йöзлысь эз юавлыны, позьö оз: шуисны и вöчисны. Тайöн, дерт жö, няйтчöдiсны кулöмаяслысь ловсö. Лыйлöм айловъяслы тайö казьтылан пассö, кыдзи висьталöны, сувтöдiсны, тыдалö, сёрöнджык нин. Юрсиктын памятникыс абу нин и уна, гырысьджыкъясысь кындзи, казьтылан пас нöшта эм вичко дорын. Сiйöс сувтöдiсны народнöй судья С.П.Кочановлы, кодöс лыйлiсны гражданскöй война дырйи жö. Сы бöрся, гашкö, сикт шöрын да, дöзьöритöны, а мöдыс бокын, да и эновтiсны нин. Кодлöнкö киыс на лыбис кисьтны сiйöс. 
Валентина Степановналöн майшасьöмыс гöгöрвоана, öд памятник — важ олöмсö казьтылан пас. Сiйöс вунöдöмöн да кисьтöмöн-пузувтöмöн и орис сiйö кадыскöд йитöдыс, и стöча ог нин тöдöй сэкся лоöмторъяс йылысь. Öнi казьтылан пасыс абу нин сиктсянь бокын, а выль артмöм уличаяс пöвстын. Абу-ö кад дзоньтавны-сувтöдны сiйöс да мичаа потшны, тöдмöдны сыкöд да сыкöд йитчöм историякöд. 

Галина НЕСТЕРОВА. 
Гижысьлöн снимок вылын: В.С.Лебедева 
казьтылан пас дорын.

Комментарии:

Добавить комментарий

Свежий выпуск: за 5 декабря