Эжва мынтöдчö йиысь

[ A+ ] /[ A- ]

OLYMPUS DIGITAL CAMERA


Орис понтона туйыс Пожöг сикт дорын. Апрель дас квайтöд лунö кыпöдiсны вуджанiнлысь апарельяс да личöдiсны поссö кутысь тросъяс. Йи кывттöдзыс вуджöдчыны воис сынöда пöдушка вылын катер. Сылöн вына пропеллеръясысь да öтарö-мöдарö дзизъялöмсьыс понтон улысь йиыс вель уна нин лэччис. Он и тöдлы, мöдас йи кылавны Эжва пасьтаыс. Та вылö дор ваыс судзсьымöн нин. Вуджисны мöдлапöлö ветымын гöгöр быдпöлöс машинаыс, медым юр жуглытöг, ковмас кö, шыбитчыны Кулöмдiнö, Сыктывкарö, да кöть кытчö — ю мöдар берегö пуксьöм оланiнъясö. Кык вежон нин сулалö кос поводдя. Кыдзи шуöны йöзыс: кын коснас и ньылыштiс восьсаинъясысь тöвбыдöн чöжсьöм лымсö. Луннас, абу кö кымöра, шондi улас вель шоныд нин, но быд вой на кынталыштлiс. Гортгöгöрса тувсовъя кызвын уджсö он на вермы бергöдны: ваялöм да поткöдлöм пес лым да йи пиын на, чышкыны öшинь ув абу жö кивыв, муыс вывтi на ва, куйöд му вылö разöдны он жö вермы — быттьö цементируйтöмаöсь чукöрсö. Буракö, регыдöн оз на шондöд, чавканъяс да душ-мöд ябыр кындзи лунвылö лэблысьяс оз на тыдавны, да и енэжад тури-юсь-дзодзöг кельöбъясыд синтö оз на гажöдны. Вель дыр пукалысь кос поводдяыд повзьöдлö жö: другысьöн кö пуксяс зэра поводдя или лун-мöд кежлö бöрддзывласны муöдз öшйöм кымöръясыс — ытваыд вермас на вель ёна ышмывлыны да пöгибö воштыны увтасiнъясö пуксьöм керкаясысь олысьяссö. Отсыштас таын вöръясын чукöрмöм лымйыс, кодi, позьö шуны, вöрзьывтöм на.
Владимир Шомысов.
Снимок гижысьлöн.

Комментарии:

Добавить комментарий

Свежий выпуск: 28 марта

Осторожно — мошенники!