…Коми пармаыд помтöм-дортöм. И быдсяма пуыс сэні быдмö-нюжöдчö лöз енэжлань. Посни и гырысь, чукля-мукля и мича статя, топыд тэчаса и руш пытшкöса… Тадзи и йöз пöвстад. Быдсяма мортыскöд жö вочаасьлан. Лёкыскöд и бурыскöд, шаньыскöд и скöрыскöд. Кор ме тöдмаси Вячеслав Бабинкöд, сійö пыр и воис меным сьöлöм вылö. Оз вышитчы, лабутнöй, кывнад оз шыблась, кöсйысяс кö, быть вöчас. И юрыс уджалö мортыдлöн. Абу öд весьшöрö быдса вит во велöдчöма А.М.Горький нима литературнöй институтын да зэв бура помалöма сійöс, дипломнöй уджсö дорйöма ки помысь лöсьöдöм аслас «Вуджöр» небöг серти. А во мысти нин Вячеслав Леонидович ветліс том гижысьяслöн став Россияса медводдза чукöртчылöм вылö, да сэні сійöс примитісны Россияса гижысь котырö. Гежöда овлö, мед ылі Коми муын чужöм-быдмöм мортлысь Енмöн сетöмторсö донъялісны татшöм вылö. И эз кöнкö, а Мöскуаын, гырысь да нималана гижысьяс водзын…
Вячеслав Бабин чужліс-быдмыліс Эжва йылын, мича Немдін сиктын. Тані помаліс шöр школа, велöдчыны некытчö эз мун да, кутшöмкö кад уджаліс видз-му овмöсын. Сэсся кочегараліс, öттшöтш веськöдліс сиктса культура керкаöн. Та бöрын том морт зільö районса рыбинспекцияын, уна вын да во сетö районын петысь «Парма гор» газетлы. Тшöкыда волывлö татчöс сикт-грездъясö, вöр посёлокъясö, йöзöдö газет лист бокъясын ассьыс очеркъяс, зарисовкаяс, висьтъяс да кывбуръяс. Таысь кындзи, Вячеслав Леонидович кутö топыд йитöд республикаса радиокöд, веськöдлö газет бердын уджалысь «Эжва» литературнöй клубöн, тшöкыда аддзысьлö районса школаясын велöдчысьяскöд.
Коми газет ышöдö Вячеслав Бабинöс водзö восьлавны, корсьны ас уджас выль ордымъяс. Сійö зільö гижны и верстьö йöзлы, и посни челядьлы, и шöр арлыда ныв-зонлы. Йöзöдö ассьыс висьт-кывбуръяссö «Войвыв кодзув» да «Би кинь» журналъясын, «Коми му» да «Парма гор» газетъясын, мукöдлаын. Уна вонад гижöма быттьö абу этша: и поэзия, и проза юкöнын. Зэв окота ошкыштны юбилярöс бöръя кадся висьтъяссьыс. Найö буретш лöсялöны талунъя олöмыслы, вöрзьöдöны сьöлöмтö да тшöктöны мöвпавны да мöвпавны. Торйöн нин «Пöсь черинянь» да «Васа да Васса» гижöдъяс. Содта нöшта со мый. Вячеслав Бабинлöн талун кежлö петаліс некымын небöг. На лыдын «Сьöлöмшöр», «Вотö Коля коляоз», «Вуджöр» да мукöд. Дасьтö поэт да проза гижысь и выльясöс. Кыдзи челядьлы, сідзи и верстьö войтырлы. «Мыджöд» кывбурын автор гижö: менам туй пö дзик жö олöм кодь ыджыд, кöть и конъяся — сувта, тайö муыс мен медся бур мыджöд… Тшупöда пасöн, дона ёртöй! Квайтымын вося юбилейöн! Кузь нэм да бур шуд тэныд!
Александр Ульянов,
коми гижысь.
Снимок Вячеслав Бабинлöн чукöртöмысь.