Районын бура тöдöны Анатолий Павлович Медведевöс. Сiйö ыджыд пай пуктiс видз-му овмöс сöвмöмö.
Чужис Башкирияса Уркасс сиктын. Челядьдырсянь тöдлiс войналысь курыд кöрсö. Ставсö нулiсны фронт вылö, а сиктсаяс кыдз кужисны, сiдзи и бергöдчисны. Овлiс, мый сёйлiсны пу кырсь да бобöнянь юр, кöм-пась абутöмла корсюрö эз ветлыны школаö. Тайö ставыс колис ёна бöрö, но буретш сьöкыд олöмыс сетiс вын, да йöз эз чегны сьöкыдлунъяс водзын.
Башкирияса видз-му овмöс институт помалöм бöрын Анатолий Павлович веськалiс Коми муö. Сэки уджалан ыджыд котыръяс веськыда шыöдчылiсны велöдчанiнъясö да диплома том специалистъясöс ыстылiсны Россия пасьтала. «Сельхозтехника» республикаса öтувъя котырлы колiсны велöдчöм том йöз, да сiйö и шыöдчылiс институтö. А.М.Медведевöс мöдöдiсны Кулöмдiнö «Сельхозтехника» котырö, пуктiсны медшöр инженерöн, некымын во мысти веськöдлысьöн нин, зiлис сэсся 13 во. Сэки зумыда уджалiсны совхозъяс, леспромхозъяс, госпромхозъяс, сельхозхимия, ПМК. Видз-му овмöс котыръясын видзисны уна скöт, вынсьöдiсны муяс, видзьяс, уджалiс матö став олысьыс.
Вöлöга вöчан ыджыд котыръяслы отсалöм могысь лöсьöдлiсны техника дзоньталан станцияяс, на пыдди сэсся лоис «Сельхозтехника котыр. Анатолий Павлович веськöдлöмöн пöвъясысь вöчлöм сарай пыдди кыпöдiсны ыджыд шоныд гараж, сэнi и дзоньтасисны, и видзисны запчасьтъяс. Бöрынджык запчасьтъяслы да оборудованиелы лöсьöдiсны механизируйтöм торъя склад. Оборудованиесö сэнi новлöдлiсны электрокарöн. Унатор вöчисны удж кокньöдöм могысь: и гараж, и машинаяс дзоньталанiн, и скöт картаясысь оборудование дзоньталан станция. 1600 квадрата метр гараж да 1100 квадрата метр ыджда склад кыпöдiсны ас вынъясöн. Лэптiсны и оланiнъяс, уджалысьяслы сетiсны 56 патера. Автобусöн новлöдлiсны удж вылö, челядьöс садйö да школаö. Кыпöдлiсны 50 дзолюклы сад, ва башня, кык ва босьтанiн. Олöма йöз öнi на казьтылöны, кыдзи Анатолий Павлович вöчис дзонь улича.
1986-öд воын КПСС райкомса медводдза секретар вöзйис кывкутысь мортлы юрнуöдны Кулöмдiнса совхозöн, кöнi видзисны 1500 скöт юр, 800-ыс вöлi мöс, 11000 гектар ыджда видзму овмöс угöддьö да 1900 гектар гöрöм му. Заптылiсны 4500 тонна турун да вöчлiсны 9000 сюрс тонна силос. Картупельсö öти гектар вылысь босьтлiсны 230 центнер, вöдитлiсны и капуста. Уджалiс 550 морт. Видз-му овмöс юкöнын тайö котырыс вöлi медводзын, но сэкжö киссян выйынöсь ляпкыд йирка скöт картаяс, кытчö позис пырны сöмын мегыралöм вöлöн. Сiйö и вöлi механизацияыс. Анатолий Павлович дыр-йи совхозлöн Кужса юкöнын кыпöдiсны 240 юрлы кукань видзанiн, резьöдiсны мöсъяслысь важ фермасö да лэптiсны выльöс; Кулöмдiнса фермаын, кытчö лым сылöмöн пыравлiс ва, лэптiсны джодж, дзоньталiсны кукань видзанiн, 240 юрлы кыпöдiсны скöт карта, вöчисны пыран туй, бетоналiсны силос гу, чипан видзанiнысь вöчисны картупель видзанiн; Донса юкöнын вужвыйöн дзоньталiсны мöсъяслысь ферма, кыпöдiсны кукань видзанiн, республикаын медводдзаöн кык судтаа картупель бöръянiн. Донын жö вöчалiсны öшинь да öдзöс куричьяс. Овмöс ас уджалысьяслы босьтчылiс аслас пиломатериалöн кыпöдны керкаяс.
Зумыда сулалiс да уджалiс совхоз. Анатолий Павловичöс тöдöны кыдз бур, сюсь, кывкутысь, сьöкыдысь повтöм, йöз да уджалысьяс вöсна ыджыд тöжда веськöдлысьöс да пуктöны пыдди.
Светлана Вяткина,
видз-му овмöс районса юкöнын юрнуöдысь специалист.