Ыджыд мывкыдлуна ань

[ A+ ] /[ A- ]


Мöдлапöв грездысь быдöн тöдö да пыдди пуктö Социалина Павловна Зыковаöс, кодöс татчöс олысьяс шуöны Линаöн. Ыджыд арлыд вылö видзöдтöг (сылы тырис 86), гортас бергöдчö ачыс на. 
Лина чужліс 1932-öд вося январ 14-öд лунö. Анастасия Ефимовналöн да Павел Николаевичлöн ыджыд семьяын вöлі öкмыс челядь: Александра, Мария, Ираида, Фаина, Николай, Социалина, Евстолия, Валерьян, Нина. Öні Социалина Павловна коли öтнас. 
Кор пансис война, Линалы вöлі öкмыс арöс. Нывка эз тöдлы шуда челядьдыр. Сiйö помнитö, кыдзи колльöдісны став сиктöн фронт вылö мунысьясöс. Сьöкыд олан туй сюрис тшöтш и налы, кодъяс колисны сиктö. Гожöмнас челядь уджалiсны гырысьяскöд öттшöтш видз вылын, а арнас муяс вылысь уберитiсны картупель. 
Социалина Павловна казьтывлö, кыдзи лым сылöм бöрын ыбъяс вылысь чукöртлісны сісь картупель, кульлісны корсö да сёйлісны косьтöмöн. Сёйлісны тшöтш кач (кульлöмаöсь ньыв пулысь кырсьсö, косьтывлöмаöсь сійöс, посньöдлöмаöсь, вöчлöмаöсь пызь и пöжавлöмаöсь кач папурка). Сыысь ёна пыкталісны, висисны. Сідзжö сёйлісны пелысь, шомакор, бобöнянь, ичöтик анькытш турун. Картупель ёна кынмавліс, а воыштліс кö, то зэв посньыд. Видзлісны мöс, сійö и дорйыліс, но куканьсö нуисны фронтлы. 
Война помасьöм йылысь юöр суис Линаöс школаын. Öшиньсяньыс видзöдісны, кыдзи клуб дорын йöзыс и бöрдісны, и йöктісны. Сэки кодъяскö волöмаöсь петкöдлыны гаж. Война эштöм бöрын кутісны дзоляника сетны нянь (морт вылö кыксё граммöн). Сьöкыд вояс вылö видзöдтöг, Лина велöдчис водзö. Öкмыс класс помалöм бöрын сійö муніс Сыктывкарö, кöні нёль во велöдчис вöр овмöс техникумын, лоис вöр кыскалан туйяс вöчысь техникöн. 
Велöдчöм бöрся Социалинаöс мöдöдісны Вöльскöйö. Сэні уджаліс вöр кыскалан туй вöчанінын. Вöльскöйын жö öтлаасис роч морткöд, Виктор Петрович Зыковкöд. Виктор трактористаліс. Кутшöмкö кад уджыштöм бöрын гозъяöс ыстісны Пузлаö, кöні Лина примитіс вöр. Пузла бöрын локтісны овны Помöсдінö. Сэні олігöн Виктор зэв томöн лёк ногöн кувсис. Линалöн ки вылын колины Надя да Оля ичöт нывъяс. Верöсыскöд босьтчылісны кыпöдны Мöдлапöлö керка, но помавны эз удитны. Стрöитчöмыс эштіс сэк, кор Социалина Павловна мöдысь петіс верöс сайö. Александр Дмитриевич Уляшевкöд чужтісны Юрий да Владимир пиянöс. 
Лина дас во чöж уджавліс тшöтш и орслöн складын заведующöйöн. Та бöрын сэсся пенсияöдзыс кассираліс коммунхозын. Уна во вöлі судса заседательöн, судьяыс волывлöма Кулöмдінысь. 
Лина Павловна зэв мича, ён гöлöса. Тöдö уна важ сьыланкыв. Томджык дырйиыс ветлывліс сьывны хорö. Хорыс вöлöма ыджыд, а репетицияяс нуöдлöма нималана Лидия Даниловна Чувьюрова. Ветлöмаöсь петкöдчыны Сыктывкарö. Бура сьылысьясöс кöсйывлöмаöсь нулыны суйöр сайö, но мый вöсна кö абу мойвиöма. Вöлöма кад уджавны, вöлöма кад и сьывны. Пыр гажöдчывлöмаöсь гудöк улö. 
Лина öні олö öтнас, верöсыс кувсьыліс. Отсасьны волывлö Володя пиыс, коді олö орччöн. Юрий пиыс олö тшöтш Мöдлапöлын, Надя да Оля нывъясыс олöны бокын: öтиыс — Усинскын, а мöдыс Краснодар крайса Ейск карын. Линалöн öкмыс внук-внучка да вит правнук. 
Социалина Павловналöн эм война кадö тылын уджалöмысь медаль. Сійö – уджвывса ветеран. Эм пыдди пуктан грамотаяс, аттьöалан письмöяс, нöшта сетлöмаöсь козинъяс. И ставыс тайö Линалы вичмис бура уджалöмысь. 
Пыдди пуктана – тадзи позьö шуны тайö шань, ыджыд мывкыдлуна мортсö. Мед жö Ен сетас дзоньвидзалун овны тайö югыд да мича вöльнöй светас! Бур мортлöн нэмыс мед лоас кузь! И енэжыс юр весьтас мед век лоас сöстöм да лöнь! 
Надежда Полшкова. 
Мöдлапöв. 
Снимок вылын: 
Социалина Павловна Зыкова.

Комментарии:

Добавить комментарий

Свежий выпуск: за 2 апреля