Ыджыд муслунöн – 60 во

[ A+ ] /[ A- ]


Дзолльын чужлöм Ангелина Афанасьевна Кудрявцевалöн (нывдырся Касева) олöмыс, кыдзи и войнакадся мукöд челядьлöн, эз вöв кокниöн, вуджöдіс уна сьöкыдлун да тшыгъялöм. 
Сылöн Афанасий Ильич Касев батьыс Улыс Вочысь, быдмис вит чой-вок пöвстын. Медыджыд Виссарион воксö босьтісны финскöй война вылö, шöрыс, Григорий, усис Великöй Отечественнöй война вылын. А медічöтыс, Афанасий, войнаöдз служитіс армияын, сэсся велöдчис Ульянаса видз-му овмöс техникумын ветеринарнöй фельдшерö. Помалöм бöрас сійöс мöдöдісны уджавны Дзолльö да Габовö. 
Агафья Андреевна мамыс чужис Улыс Вочын жö ыджыд семьяын. Бать-мамыслöн вöліны дасöнöсь. Сылысь Николай Андреевич Кочанов воксö босьтлісны война вылö, бергöдчис доймалöмöн. Ичöтджык Алексей Андреевич воксö фронт вылö нуисны 1944-öд воын, кор сылы вöлі 17 арöс. Гортас бöрсö эз бергöды – усис. 
Афанасий Ильич да Агафья Андреена Касевъяс öтлаасьöм бöрын олісны Дзолльын. Виччысисны кагаöс. Шуисны: пи кö чужас, шуасны Эдикöн, ныв кö – Ангелинаöн. И 1941-öд вося июнь 1-öд лунö чужис ныв. 
— Батьлöн фронт вылö мунігöн меным вöлі чужöмсянь сöмын на тöлысь, — казьтыліс Ангелина Афанасьевна. – Став сиктöн колльöдісны сійöс Улыс Вочöдз, кысянь Речьёль шорöдз матö нёль километра. Сэки Дзольсянь юрсиктöдз туйыс муніс Габов да Улыс Воч пыр. Мам висьтавліс, мый бать мунігас кузяла нуис менö ки вылас. Кöнкö, мöвпаліс, мый война помасяс öдйö, и бергöдчас гортас, кутас быдтыны ассьыс дзоляник нывсö. 
Письмöясыс локтісны во джын. Гижис медсясö войнас: «Сулалам коскöдз ваын, öти берегын ми, мöдас – фашистъяс. Кутам тышкасьны помöдз, ог бöрыньтчöй…» Сэсся воис юöр – вошис лы ни ку. 
Сёрöнджык, школаын велöдчигöн, Ангелина Афанасьевна бать кузяыс шыöдчыліс Кулöмдінса военкоматö, кысянь гижисны, мый сійö збыльысь вошис юöртöг. Паметь книгаын пасйöма, мый служитліс 37360-öд номера военнöй часьтын радöвöйöн да вошис юöртöг. Верстьööн нин кыкысь шыöдчыліс «Жди меня» передачаö, но некутшöм вочакыв эз и волы. 
Война кадö ань вöлі кагаöн на да помнитö этшатор. Кыдзи и мукöд, олісны сьöкыда – тшыгъялісны, ёна кынмалісны. Сылысь, кыдзи и мукöд зонпоснилысь, фашистъяс мырддисны челядьдырсö. Кор сылы вöлі вит арöс, бöр локтісны овны Улыс Вочö. Мунісны вöла-доддяöн, мукöд транспорт эз вöв. Сьöкыда бергöдчисны и война бöрын. Верстьöяс удж вылö мунлісны югдігöн, локтісны сёрöн. Душ-мöд час узясны и бара — удж вылö. Кыпöдісны колхоз. 
— Пыр на эз вун, кыдзи коймöд классын велöдчигöн усьöм фронтöвикъяслöн челядьлы школаö вайисны еджыд да розöвöй рöма блузкаяс. Ме бöрйи розöвöйöс. Гортын вöлі радио. Ме радейтлі лыддьыны книгаяс, котравны лыжи вылын. Дерт, лыжиыс эз вöв, да Илья дядь сетлывліс меным лямпа, — водзö казьтыліс Ангелина Афанасьевна. 
Вочса школаын сизим класс помалöм бöрын сійö вуджис Мöскашор посёлокö. Пырис уджавны нянь пöжаланінö пöжасьысьлы отсасьысьöн. Посёлокö сэки локтісны армия бöрся зонъяс, нёль шофёр, рочьяс. /ти на пиысь Олег Михайлович Кудрявцев, пыр и воис нывлы сьöлöм вылас. Кад мысти петіс сы сайö верöс сайö. Сэки сійö вöлі том на, 18 арöса. 
Олег Михайлович чужліс 1936-öд вося октябр 10-öд лунö Ленинград обласьтлöн Тосненскöй районса Красный Бор деревняын. Сылöн Михаил Иванович батьыс вöлі стрöитчысьöн, Ольга Васильевна мамыс бергöдіс гортса овмöс. Быдтісны-велöдісны вит челядьöс — куим пиöс да кык нылöс. Батьсö босьтісны фронт вылö, кор Олеглы вöлі вит арöс. Войнаöдз бать-мамыслöн найö вöліны куимöн на: Виктор вок, Нина чой да сійö. Война кад йылысь помнитіс этшатор. 
— Сійö казьтывліс, кыдзи фашистъясöн Ленинград кытшö босьтöм бöрын мамыс пуксьöдіс челядьсö даддьö да нуис карсьыс ылöджык. Вöлі зэв кöдзыд, челядь ёна кынмалісны. öти деревняын (нимсö эз куж висьтавнысö) найöс ас дорас овмöдіс шань нывбаба. Сэтчö и кольччисны овны. Казьтывліс сідзжö, кыдзи немечьяс куталісны верстьöясöс да йöртісны сарайö, кöсйисны лыйлыны, но партизанъяс удитісны мездыны найöс. Война бöрын Ольга Васильевна мамыс вöлі колхозса председательöн. Война кусöм бöрын батьыс дыр корсис семьясö, аддзис сöмын вит во мысти. Михаил Иванович фронт вылын вöлі артиллеристöн. Вöрöгкöд повтöг тышкасьöмысь сылы вичмöдісны уна награда, кыкыс на пиысь – Гöрд Звездалöн орден. Олег, вöлöм, öшöдас найöс морöс вылас да котралö да ошйысьö зонпосни водзын. Сэсся сылöн нöшта чужисны Тамара да Светлана чойяс да Славик вок. Света кувсис висьöмысь вит арöсöн. Сэсся Кудрявцевъяслöн семья вуджис овны Даугавпилс карö. Сэні батьыс кыпöдіс керка, — вайöдіс Ангелина Афанасьевна верöсыслысь казьтылöмъяссö. 
Олег Михайлович велöдчис тайö карас жö. 1952-öд восянь уджаліс «Электроинструмент» заводын токарöн. 1954-öд воын велöдчис шофёрö. 1955-öдын муніс армияö, служитіс куим во. Армия бöрын нёль салдатöс коралісны уджавны Коми муö. Мöдöдісны Мöскашор посёлокö. Медводдза кадас уджаліс «МАЗ» машина вылын, кодлöн бокас вöлі буйволлöн пас. Тані и паныдаліс ассьыс гöтырсö — Ангелина Касеваöс. 1959-öд воын öтлаасисны. 1967-öд воын мунісны Латвияö, Даугавпилс карö. Кык во мысти К.Е.Краснеевичлöн да М.Н.Терлецкийлöн корöм серти бöр локтісны Зимстанö. Чужис куим челядь: Валерий 1960-öд, Лариса 1965-öд да Василий 1976-öд воясын. Олег Михайлович уджаліс «МАЗ», автобус, К-700 трактор вылын. Зэв радейтіс техника. Ангелина Афанасьевна вит во веськöдліс нянь пöжаланінöн, 1974-öд воын вуджис леспромхозö да уджаліс увйысьысьöн шойччöг вылö петтöдз. Гозъя кыкнанныс ставнас уджалісны 40-ысь унджык во. Уна во бура зільöмысь налы вичмöдлісны почёт грамотаяс, аттьöалан гижöдъяс, «Уджвывса ветеран» ним. 
Таво Олег Михайловичлöн да Ангелина Афанасьевналöн гозйöдчöмсянь тырис 60 во. Пыр олісны ыджыд муслунöн, öта-мöдсö пыдди пуктöмöн да гöгöрвоöмöн. Майбыр, сöмын ов да выв, лелькуйт внук-внучкаясöс (стöчджыка кö, налöн куим внучка, öти правнук да кык правнучка). Да сöмын тай Олег Михайловичлöн регыд на кусіс олöмыс. Пыр кежлö эновтіс муса Ангелина Афанасьевна гöтырсö, челядьсö, внукъяссö, кодъяслöн сьöлöмын сійö кольö радейтана верöсöн, батьöн, пöльöн да ыджыд батьöн. 
А.А.Кудрявцевалöн 
чукöртöмысь снимок вылын: 
О.М. да А.А.Кудрявцевъяс ныла-пиаыскöд. 
Дасьтiсны Зимстанса шöр школаысь 
8-öд класса велöдчысьяс Е.В.Юдиналöн веськöдлöм улын (2018 во).

Комментарии:

Добавить комментарий

Свежий выпуск: за 7 ноября