Некымын во сайын Коми республикаын босьтчисны уджавны «Менам документъяс» шöринъяс. Талун татшöмыс Комиын 92, на пиысь сизимыс – Кулöмдін районын. Быд шöрин шöркодя могмöдö матö куим сюрс мортöс. Таво вылö районса олысьяс шыöдчылісны уна сикас дас сюрс сайö юалöмöн. Медся тшöкыда йöз шыöдчöны Кулöмдінса шöринö, коді дзик юрсикт шöрын. Аслас могъясöн шыöдчыліс и Паспомса олысь Полина Буторина.
— Августын ми ньöбим патера. Водзвыв пыравлім «Менам документъяс» шöринö, юалім, кутшöм документъяс миянлы ковмасны, мед гижöдны ас вылö. Ньöбöм бöрын локтім патера вузалыськöд тшöтш. Шöринса специалистъяс спутьысь-спуть висьталісны, мый колö вöчны, босьтісны миянлысь колана бумагъяс, шуисны, мый звöнитласны да юöртасны, кор ставыс лоас дась да позяс босьтны документъяс.
Патера ньöбöм бöрын «Менам документъяс» шöрин пыр жö пропишитчим, верöс босьтіс справка, мый сійöс эз мыждывны, ме босьті судзсьытöма олысь семья кузя справка да с.в. Шöрин уджалö быд лун – асывнас локті, пыравлі, пажунöдз прöстми нин. Зэв воис сьöлöм вылö шöринса специалистъяслöн удж: шаньöсь, сюсьöсь – ставсö гöгöрвоöдісны, висьталісны. Öні, мыйкö кö ковмас, бара на шыöдча «Менам документъяс» шöринö, — висьталіс Полина Буторина.
Александра Савеня.

Снимок вылын: «Менам документъяс» Кулöмдін районса шöринысь специалистъяс сетасны колана отсöг.