Кузь юрсиа, мича нюма, зэв шань, вöсньыдик – татшöмöн миян классö локтіс выль велöдысь Ия Ивановна. Миянлы лоис мöд мамöн, код дорö позис шыасьны быд юалöмöн. Котравлім и гортöдзыс, öтув ветлім войколöн походъясö, узьлім палаткаясын Кадам дорын, чукöртлім бумага да кöрт, петавлім гольöдчыны рöштво лунъясö, петкöдчывлім школаса гажъясын. И ставсö öтув Ия Ивановнакöд. Ас костын сійöс шулім «катшасинöн», сы вöсна мый зэв радейтліс тайö видзвыв дзоридзсö. 
Быдмыштім, кутім и зонъяс вылö кыйкъявны. Бара на миянлы ковмис Ия Ивановна. Висьтавлім ставсö, мый майшöдліс миянöс, норасьлім, кор син эз чöвтлы сьöлöм вылö воысь морт. Кывзас, сетас сьöлöм, чышкас синванымöс, и бара быттьö ставыс бур. 
10-öд класс помалігöн войбыд ветлöдлім Керчомъя кузя, сёрнитім, Ия Ивановналы висьтавлім ассьыным став кöсйöмъяснымöс. Ме öні мöвпыштла да, велöдысьнымлöн öд вöлі аслас семья, и эз ичöт, а век вöлі миянкöд. Рытъяснас гортöдзыс на вöлі волам. Миян школаын велöдчан кадыс вöлі зэв интереснöйöн, öні эм мый казьтывны, мед и сералыштны, и майшасьыштны да выльысь ставсö нуны сьöлöм пыр. Унаторйö велöдіс миянöс Ия Ивановна: мöвпавны, вермытöмлы мыччыны ки, лыддьысьны, радейтны вöр-ва, бура тöдны Коми мунымöс. 
1978-öд воын Ия Ивановна козьналіс меным ассьыс снимок. Сэтчö гижис: «Да, ті мунанныд школаысь, но некор онö мунöй менам сьöлöмысь. Локтасны «менам» выль челядь, но тöд, Катюша, мый ті вöлінныд медводдзаöн, и тіянлысь ин менам сьöлöмын некод оз мырддьы: медводдзаöн тіян бöрын некод нин оз ло. Ов, донаöй, вай йöзлы нимкодьлун, мед тэныд паныдасясны выль ёртъяс, но и важъяссö эн вунöд, куж видзны ёртасьöм. Эска, мый тэа-меалöн ёртасьöмлöн ордым некор оз вош». 
Август 2-öд лунö Ия Ивановналöн чужан лун. 1978-öд воын 10 «а» класс помалысьяс чолöмалам радейтана велöдысьöс, сиам дзоньвидзалун, му вывсьыс став шоныдсö, бурсö, донасö. Мед век кежлö коляс «миян Ия Ивановнаöн», сэтшöмöн, кутшöмöн ми сійöс тöдам. Ми ыджыда пуктам пыдди, зэв ёна кыпалам Тіянöн, Ия Ивановна! 

Екатерина Ульнырова. 
Руч. 
Ия Ивановнаöн 
козьналöм снимок.